International

'බාබා වංගා'ගේ බිහිසුණු අනාවැකියෙන් මුළු ජපානයම කැළඹෙයි

Saturday, 05 July 2025 - 8:34 pm

ජපානයට අද බියජනක දිනයක් බවට පත්ව තිබෙනවා.

ඒ ඊට හේතුව එරට 'බාබා වංගා’ හෙවත් මංගා අනාවැකි කියන්නියක වන රියෝ ටස්ටුකි, සිය ‘The Future I Saw’ නම් පොතේ පළ කළ අනාවැකියක් හේතුවෙන්.

ජපානය සඳහා වූ මෙම බියජනක අනාවැකිය කාලගුණ විද්‍යාඥයින්, භූමිකම්පා විශේෂඥයන් සහ ජපන් රජය තුළද කැළඹීමක් ඇති කර තිබෙන බවයි වාර්තා වන්නේ.

එම පොතට අනුව, අද පැසිෆික් සාගර වෙරළ තීරයේ භූමිකම්පාවක් සිදුවනු ඇති අතර එය 2011 සුනාමිය මෙන් තුන්ගුණයක් විශාල සහ විනාශකාරී විය හැකි බව සඳහන්.

මෙම අනාවැකිය සම්බන්ධයෙන් ජපානය, හොංකොං, තායිවානය, චීනය සහ දකුණු කොරියාව වැනි රටවල සමාජ මාධ්‍ය ජාල තුළද මේ වනවිට දැඩි කතාබහක් නිර්මාණය වී තිබෙනවා.

මෙවන් පසුබිමක දකුණුදිග ජපානයට අයත් තොකෝරා දූපතේ පසුගිය ජූනි 21 වැනිදා රික්ටර් පරිමානයේ ඒකක 5.5ක ප්‍රබලත්වයෙන් යුතු භූ කම්පනයක් හටගත් අතර, ඉන් පසුව ගෙවුණු දෙසතියක කාලය තුළ එම දූපත පසුකම්පන 900කට වැඩි සංඛ්‍යාවකට මුහුණදුන් බව ද වාර්තා වනවා.

අදත් කුඩා භූ කම්පන කිහිපයක්ම හොකයිඩෝ සිට කියුෂු දක්වා ප්‍රදේශවලට බලපා ඇති අතර, ආරක්ෂාව සඳහා ජනතාව ඉවත් කිරීමටද කටයුතු කර තිබෙනවා.

හොංකොං හි ග්‍රේටර් බේ ගුවන් සේවය ටොකුෂිමා වෙත දින නියමයක් නොමැතිව ගුවන් ගමන් අත්හිටුවන බව නිවේදනය කර ඇත්තේ මෙවන් පසුබිමකයි.

ජපාන රජය මහජනතාවගෙන් ඉල්ලා සිටීන්නේ සන්සුන්ව කටයුතු කරන ලෙසයි.

මෑත කාලීනව සිදුවූ කිසිදු භූ කම්පනයක් අනාවැකියකට සම්බන්ධ කළ හැකි විද්‍යාත්මක පදනමක් නොමැති බව ද රාජ්‍ය බලධාරීන් අවධාරණය කරනවා.