Local

ஜனாதிபதிக்கு எதிரான வழக்கு நேற்று தள்ளுபடி

Thursday, 29 August 2024 - 9:37 am

சில விடயங்களின் அடிப்படையில் ஜனாதிபதித் தேர்தலில் போட்டியிடுவதற்கு ஜனாதிபதி ரணில் விக்கிரமசிங்க தகுதியற்றவரென, அறிவிக்குமாறு கோரி உயர் நீதிமன்றத்தில் தாக்கல் செய்யப்பட்ட மனு நேற்று (28) தள்ளுபடி செய்யப்பட்டது.

பதில் பொலிஸ் மாஅதிபரை நியமிக்கத் தவறியமை மற்றும் உயர் நீதிமன்றத்திற்கும் மேல் முறையீட்டு நீதிமன்றத்திற்கும் நீதியரசர்களை நியமிகத் தவறியமை முதலான விடயங்களை அடிப்படையாகக் கொண்டே, இந்த அடிப்படை உரிமை மனு சமர்ப்பிக்கப்பட்டிருந்தது.

மனுவை விசாரணைக்கு எடுத்துக்கொள்வதை உயர் நீதிமன்றம் நிராகரித்ததுடன், வழக்கின் செலவாக 50 ஆயிரம் ரூபாவை செலுத்துமாறும் மனு தாரருக்கு நீதிமன்றம் நேற்று உத்தரவு பிறப்பித்தது.

மனுதாரர்கள் நீதிமன்றத்தில் உண்மைக்குப் புறம்பான விடங்களை முன்வைத்துள்ளதாகவும், இந்த மனு மூலம் அரசியலமைப்பின் 92 ஆவது சரத்தை மீறியுள்ளதாகவும் சட்ட மாஅதிபர் சார்பில், ஆஜரான மேலதிக சட்ட மாஅதிபர் நெரின் புள்ளே, ஆட்சேபனை தெரிவித்தார். ஜனாதிபதி ரணில் விக்கிரமசிங்க மற்றும் சட்டமா அதிபர் ஆகியோரை பிரதிவாதிகளாகக் குறிப்பிட்டு, சட்டத்தரணி ஆர்.எஸ்.பி. ரணசூரியவினால் இந்த மனு தாக்கல் செய்யப்பட்டிருந்தது.

தேசபந்து தென்னகோனின் அதிகாரங்கள், செயற்பாடுகளை முன்னெடுப்பதை தடைசெய்து, ஜூலை மாதம் உயர் நீதிமன்றம் பிறப்பித்த இடைக்கால உத்தரவு, பதில் பொலிஸ் மாஅதிபரை நியமிப்பதில் ஜனாதிபதியை தடுக்கவில்லை என்றும் மனுதாரர் இந்த மனுவில் சுட்டிக்காட்டியுள்ளார்.

எதிர்வரும் ஜனாதிபதி தேர்தலில் போட்டியிடுவதால் தனக்கு நியமனம் வழங்க முடியாது எனக் கூறிய ஜனாதிபதி, வெளிவிவகார அமைச்சர் அலி சப்ரியை நீதி அமைச்சராக நியமித்துள்ளதாகவும் மனுதாரர் அதில், குறிப்பிட்டிருந்தார். இதன் மூலம், அரசியலமைப்பை ஜனாதிபதி மீறுவதாகவும், தனக்கு வழங்கப்பட்டுள்ள அதிகாரங்களை தவறாக பயன்படுத்துவதாகவும் மனுதாரர் குற்றம் சுமத்தியிருந்தார்.