குரங்கம்மை வைரஸ் பரவல் தீவிரம்; WHO வினால் வழிகாட்டல் கோவை சுகாதார அமைச்சு விரைவில் வெளியிடும்
Saturday, 17 August 2024 - 8:59 am
உலகை தற்போது அச்சுறுத்தி வரும் குரங்கம்மை வைரஸ் தொடர்பில் உலக சுகாதார ஸ்தாபனத்தினால் வழிகாட்டல் கோவை வெளியிடப்பட்ட பின்னர் இலங்கைக்கான வழிகாட்டல் கோவையை வெளியிடவுள்ளதாக சுகாதார அமைச்சு தெரிவித்துள்ளது.
Mpox எனப்படும் குரங்கம்மை தொற்று தொடர்பில் உலகளாவிய ரீதியில் உலக சுகாதார ஸ்தாபனத்தினால் அவசரநிலை பிரகடனப்படுத்தப்பட்டது.
வைரஸ் தொற்று இலங்கைக்குள் பரவாமல் தடுக்க எடுக்கப்பட வேண்டிய நடவடிக்கைகள் தொடர்பில் முதற்கட்ட பேச்சுவார்த்தைகள் ஆரம்பிக்கப்பட்டுள்ளதாக சுகாதார அமைச்சின் பொதுச் சுகாதாரம் தொடர்பான பிரதிப் பணிப்பாளர் நாயகம் எஸ்.எம்.ஆனல்ட் தெரிவித்துள்ளார்.
அதேவேளை Mpox வைரஸ் தற்போது மத்திய மற்றும் கிழக்கு ஆபிரிக்க வலய நாடுகள் முழுவதும் பரவியுள்ளது. அத்தோடு ஆபிரிக்க கண்டத்துக்கு வெளியே முதன்முதலில் குரங்கம்மை பாதிப்பு சுவீடனில் பதிவாகியுள்ளது.
குரங்கம்மை, கொடிய நோய்த்தொற்று வகையைச் சேர்ந்தது என்றும், இது முதலில் கொங்கோ நாட்டில் வேகமாக பரவியதால் சுமார் 450 நபர்கள் உயிரிழந்துள்ளதாகவும் உலக சுகாதார ஸ்தாபனம் தெரிவித்துள்ளது.
