විපක්ෂ නායක සජිත් ප්‍රේමදාස මහතා සුබපැතුම් එක් කරමින් පවසා සිටියේ වචනයේ පරිසමාප්ත අර්ථයෙන් ම පරිණත ආචාර්යවරයකු වූ සුසිල් ප්‍රේමජයන්ත මහතා ලද මේ විශිෂ්ට ජයග්‍රහණය පෞද්ගලික ව එතුමාටත් රටටත් ලැබුණු විජයග්‍රහණයක් බවයි.
යුනෙස්කෝ අධ්‍යක්ෂ මණ්ඩලයට තේරී පත්වීම ඉතා දුලබ මෙන් ම අසීරුවෙන් ලබාගත යුතු අවස්ථාවක් බවත් එවන් තනතුරක් සඳහා ජාත්‍යන්තර ඡන්ද විශාල ප්‍රමාණයක් දිනාගනිමින් තේරී පත් වූ සුසිල් ප්‍රේමජයන්ත මහතාට දකුණු ආසියානු කලාපයට හා සමස්ත ලෝකයට ම සේවය කිරීමට මහඟු අවස්ථාවක් මෙමගින් උදා වූ බවත් රට වෙනුවෙන් හා පාර්ලිමේන්තුව වෙනුවෙන් තමන් ඒ සඳහා සුබපැතුම් එක් කරන බවත් ආචාර්ය බන්දුල ගුණවර්ධන මහතා මෙහි දී පැවසී ය.
ප්‍රේමජයන්ත මහතා ප්‍රංශයේ පැරිස් නුවර පැවති යුනෙස්කෝ මූලස්ථානයේ දී මෙවර යුනෙස්කෝ අධ්‍යක්ෂ මණ්ඩලයට තේරී පත් වූ අතර මින් පෙර 2008 වර්ෂයේ ද එම තනතුර හොබවමින් රටට කීර්තියක් අත් කර දුන් බැව් සඳහන් කළ සුදර්ශන දෙණිපිටිය මන්ත්‍රීවරයා ද රටවල් විශාල සංඛ්‍යාවක් අභිභවා ලද මෙම දුලබ ජයග්‍රහණය වෙනුවෙන් අධ්‍යාපන අමාත්‍යවරයාට සුබපැතී ය.
මෙහි දී ඩලස් අලහප්පෙරුම, විමල් වීරවංශ ඇතුළු පාර්ලිමේන්තු මන්ත්‍රීවරු රැසක් ම සුසිල් ප්‍රේමජයන්ත අමාත්‍යවරයා වෙත සිය උණුසුම් සුබපැතුම් පිරිනැමූහ.
