ග්‍රාම නිලධාරීන් වර්ජනයකට යොමුකර ඡන්ද කල් දාන්න ආණ්ඩුව හදන බවට සජිත්ගේ කතාව ප්‍රතික්ෂේප කරනවා - ශ්‍රී ලංකා රාජ්‍ය නිලධාරී වෘත්තීය සමිති සම්මේලනය
Sunday, 04 August 2024 - 8:16 am
වෘත්තීය ඉල්ලීම් ලබා නොදීම තුළ ග්‍රාම නිලධාරීන් මැතිවරණ රාජකාරී වර්ජනයකට යොමුකර වර්තමාන ආණ්ඩුව ඉදිරියේදී පැවැත්වීමට නියමිත ජනාධිපතිවරණ නොපවත්වා සිටීමට එය හේතුවක් කර ගත හැකි බවට විපක්ෂ නායක සජිත් ප්‍රේමදාස මහතා කළ ප්‍රකාශය ප්‍රතික්ෂේප කරන බව ශ්‍රී ලංකා රාජ්‍ය නිලධාරී වෘත්තීය සමිති සම්මේලනය පවසයි.
ශ්‍රී ලංකා රාජ්‍ය වෘත්තිය සමිති සම්මේලනයේ සභාපති සුමිත් කොඩිකාර මහතා මේ සම්බන්ධයෙන් නිකුත් කළ මාධ්‍ය නිවේදනයක මෙසේ ද සඳහන් වෙයි.
විපක්ෂ නායක සජිත් ප්‍රේමදාස මහතා පසුගිය 01 වැනිදා ග්‍රාම නිලධාරී වෘත්තීය සංගම් නියෝජිතයින් සමඟ පැවැත්වූ බව කියන සාකච්ඡාවකදී කර ඇති මෙම ප්‍රකාශය පිළිබඳව ශ්‍රී ලංකා රාජ්‍ය නිලධාරී වෘත්තීය සමිති සම්මේලනය අවධානය යොමු කරන ලදි. මේ වනවිට 2024 නව ජන්ද හිමි නාමලේඛනය සකස් කර එහි මූලික කටයුතු ග්‍රාම නිලධාරීන් ඉතා සාර්ථකව ඉටු කිරීම තුළ මැතිවරණ කොමිසම එය අනුමත කර ඇත.
මෙවර ජනාධිපතිවරණය සඳහා එම ලේඛනය යොදා ගැනීමට ද තීරණය කර තිබේ. එමෙන්ම මැතිවරණ කොමිසමේ උපදෙස් සහ මෙහෙයවීම මත මෙවර ජනාධිපතිවරණය සඳහා යොදා ගැනීමට නියමිත ජන්ද මධ්‍යස්ථාන සකස් කර ගැනීම සහ නිශ්චිත කර ගැනීමේ කටයුතු ද ග්‍රාම නිලධාරීන්ගේ මැදිහත් වීම මත අවසන් වෙමින් පවතී. එලෙසම 2024 ඡන්ද හිමි නාමලේඛනයට ඇතුළත් ආබාධිත ප්‍රජාව පිළිබඳ තොරතුරු ද 2024 පෙබරවාරි මස 01 දිනෙන් පසු මියගිය ජන්ම හිමියන්ගේ තොරතුරු ද ග්‍රාම නිලධාරීන් සකස්කර මැතිවරණ කොමිසම වෙත යොමු කිරිමට පියවර ගෙන තිබේ. ජනාධිපතිවරණයේදී තැපැල් ඡන්ද භාවිත කිරීමට බලාපොරොත්තු වන ජන්ද හිමියන්ගේ තොරතුරු ලබාදීම උදෙසා 2024 ජන්ද හිමි නාමලේඛනය ග්‍රාම නිලධාරී කාර්යාලවල මේ වනවිට ප්‍රදර්ශනය කර ඇත.
එබැවින් මේ අකාරයට 2024 ජනාධිපතිවරණය පැවැත්වීමේ මූලික රාජකාරි කටයුතු ග්‍රාම නිලධාරීන් විසින් ඉතාමත් සාර්ථකව සිදු කරමින් සිටින බව පෙන්වා දෙනු කැමැත්තෙමි. එබැවින් කුමන හෝ පාර්ශ්වයකගේ වුවමනාවන් ඉෂ්ට කර ගැනීමට ග්‍රාම නිලධාරීන් අතකොලුවක් බවට පත්ව මෙවර පැවැත්වීමට නියමිත ජනාධිපතිවරණය කඩාකප්පල් කිරීමට අප කටයුතු නොකරන බව වගකීමෙන් යුතුව ප්‍රකාශ කරමු. එලෙසම මේ රටේ ජනතාවගේ ප්‍රජාතන්ත්‍රවාදී මූලික අයිතියක් වන ජනාධිපතිවරණය පැවැත්වීම සඳහා නියමිත කාලසීමාව තුළ ජනාධිපතිවරණ රාජකාරිවලට අදාළ කිසිදු වෘත්තීය ක්‍රියාමාර්ගයක් ගැනීමට ග්‍රාම නිලධාරී වෘත්තීය සංගම් කිසිවක් මේ වනවිට තීන්දුකර නොමැති බවද අදාළ මාධ්‍ය නිවේදනයේ සඳහන් වෙයි.
