අත්අඩංගුවටගත් විරෝධතාකරුවන් රක්ෂිත බන්ධනාගාර ගත කෙරේ
Monday, 02 December 2024 - 10:00 pm
ඉල්ලීම් කිහිපයක් මුල්කර ගනිමින් බත්තරමුල්ල පැලවත්ත අධ්‍යාපන අමාත්‍යාංශය ඉදිරිපිටදී විරෝධතාවයේ යෙදී සිටියදී කලාකාරී ලෙස හැසිරුණු බවට අත්අඩංගුවට ගත් පුද්ගලයන් සිව් දෙනෙකු අධිකරණය වෙත ඉදිරිපත් කිරීමෙන් පසු ලබන 10 වනදා දක්වා රක්ෂිත බන්ධනාගාරගත කරන ලෙස කඩුවෙල වැඩබලන මහෙස්ත්‍රාත් කමල් ප්‍රසන්න විජේසිරි මහතා අද (02) නියෝග කළේය.
අයුතු ජන රාශියක සාමාජිකයන්වීම සහ පොලිස් නිලධාරීන්ට තුවාල සිදුකිරීම යන චෝදනා යටතේ තලංගම පොලිසිය විසින් මෙම සැකකරුවන් අධිකරණය වෙත ඉදිරිපත් කර තිබුණි.
සැකකරුවන් අධිකරණයට ඉදිරිපත් කරමින් පොලීසිය පැවසුවේ මෙම සැකකරුවන් කලහකාරී ලෙස හැසිරෙමින් උප පොලිස් පරීක්ෂකවරයෙකු ඇතුළු පොලිස් නිලධාරීන් තිදෙනෙකුට තුවාල සිදුකර ඇති බවත් එම පොලිස් නිලධාරින් තිදෙනා කොළඹ ජාතික රෝහලේ සහ නැගෙනහිර කොළඹ මූලික රෝහලේ ප්‍රතිකාර ලබන බවයි.
ඒ අනුව කරුණු සලකා බැලූ වැඩබලන මහෙස්ත්‍රාත්වරයා එම සැකකරුවන් සිව්දෙනා ලබන 10 වනදා දක්වා රක්ෂිත බන්ධනාගාරගත කරන ලෙසත් එදිනට සැකකරුවන් හඳුනාගැනීමේ පෙරට්ටුවක් වෙත යොමුකරන ලෙසත් නියෝග කළේය.
සැකකරුවන් වෙනුවෙන් නීතිඥවරුන් වන නුවන් බෝපගේ, නුවන් ජයවර්ධන මහත්වරු ඇතුළු නීතිඥ කණ්ඩායමත් ඉදිරිපත් විය.
(1).webp)
(1).webp)
