එහිදී වැඩිදුරටත් හිටපු ඇමැති රවි කරුණානායක මහතා මෙසේද පැවසීය.

මම හිතන්නේ අපේ රට ඉතාමත් අඳුරු කාලයක ගමන් කරන වෙලාවක්. ආර්ථිකය කඩාගෙන වැටුණා. මා හිතන විදිහට වර්තමාන ජනාධිපති වික්‍රමසිංහ මහතා අපේ රට පැවැති අඳුරු යුගයෙන් යම් තරමකට ඉදිරියට ගෙනත් තිබෙනවා. ඒක ලෙහෙසි ගමනක් නෙමෙයි.නමුත් මේ අයවැයත් අමාරු දුෂ්කරතාවෙන් උඩට ගේන්න පුළුවන්. මේ අවස්ථාවේ අපි සියලු දෙනාම සාමූහික හැඟීමකින් උදව් කළ යුතුයි. වැටිලා තිබෙන ආර්ථිකය ගොඩගැනීමට එතුමා කටයුතු කරනවා. මේ රට බංකොලොත් කළේ එතුමා නෙමෙයිනේ. ඒ නිසා මේ ආර්ථික අවපාතයෙන් එළියට එන එක ලේසි කටයුත්තක් නෙමෙයි. අප කළ යුත්තේ අපනයන ආර්ථිකය ශක්තිමත් කිරීමයි.

හැමදේම නිකං දෙනවට වඩා ස්වාධීනව මහන්සි වෙලා වැඩ කරලා ආර්ථිකය ශක්තිමත් කරගත යුතුයි. කොම්පැණි ලක්ෂ එකහමාරක් පමණ තියෙනවා.නමුත් බදු ගෙවන ෆයිල් තියෙන්නේ විසිදාහයි. මේක පුදුම රටක්.මේ තත්ත්වය අපි වෙනස් කළ යුතුයි.

රජයේ නිලධාරීන් දක්ෂයන් ඉන්නවා. නමුත් 15%, 20% කට්ටිය මේ රට නොමඟ යවලා තියෙනවා. හැමෝම දේශපාලනඥයන්ට ඇඟිල්ල දික් කරනවා. අද ලංකාවේ ඉන්නේ දේශපාලකයෝ නවදාහක් විතර. අපි කියමුකෝ මේ දේශපාලනඥයෝ ඔක්කොම එපා කියලා. එතකොට ලක්ෂ දාහතක රාජ්‍ය නිලධාරීන් මොකද කරන්නේ. මේ හැමදේම කරන්න තියෙන්නේ ඔවුන්ගෙන්. මේ රට අවුරුදු 75 තිස්සෙම එක් එක් කෙනාට ඇඟිල්ල දික් කර ප්‍රශ්න මඟ ඇරලා තියෙන්නේ. දැන්වත් ඒ තත්ත්වය වෙනස් කළ යුතුයැයි ඒ මහතා පැවසීය.