වගා හානි වන්දි ගෙවීම ආරම්භ කෙරේ
Tuesday, 11 February 2025 - 5:18 pm
පසුගිය වසරේ නොවැම්බර් මස 26 දින සිට ඇති වූ ගංවතුර තත්ත්වය හේතුවෙන් හානියට පත්වූ වගාවන් පරීක්ෂා කර වන්දි ලබාදීම මේ වනවිට ආරම්භ කර තිබෙනවා.
ඒ අනුව, පොළොන්නරුව දිස්ත්‍රික්කයේ ගොවීන් 6,239 වෙනුවෙන් රුපියල් මිලියන 114ක මුදලක් නිදහස් කර ඇති බවයි කෘෂිකාර්මික හා ගොවිජන රක්ෂණ මණ්ඩලය සඳහන් කළේ.
එසේම වවුනියා, මුලතිව්, ත්‍රිකුණාමලය යන දිස්ත්‍රික්කවලින් මණ්ඩලය වෙත ලැබුණු නිර්දේශිත වගා හානි අයදුම්පත්වලට අදාළ මුදල් ඔවුන්ගේ ගිණුම් වෙත බැර කිරීමේ කටයුතු මේ වන විට ආරම්භ කර ඇති බවයි සඳහන් වෙන්නේ.
මීට අමතරව නුවරඑළිය දිස්ත්‍රික්කයට ඇද හැළුණු අධික වර්ෂාව හේතුවෙන් වී, අමු මිරිස් හා අර්තාපල් යන වගාවන්ට සිදු වූ හානියට අදාළ වන්දි මුදල් තක්සේරු කිරීමේ කටයුතු ද මේ වන විට ආරම්භ කර ඇති බවයි කෘෂිකාර්මික හා ගොවිජන රක්ෂණ මණ්ඩලයේ සභාපති ප්‍රේමසිරි ජාසිංආරච්චි වැඩිදුරටත් ප්‍රකාශ කළේ.
.webp)
