අයහපත් කාලගුණයත් සමඟ ළමුන් අතර රෝග කිහිපයක් ව්‍යාප්ත වෙයි
Thursday, 23 November 2023 - 12:48 pm
පවතින වැසි සහිත කාලගුණ තත්ත්වයත් සමඟ ළමුන් අතර රෝග කිහිපයක් ව්‍යාප්ත වෙමින් පවතින බව රිජ්වේ ආර්යා ළමා රෝහලේ ළමා රෝග විශේෂඥ වෛද්‍ය දීපාල් පෙරේරා පවසනවා.
ඒ අනුව කැස්ස, සෙම්ප්‍රතිශ්‍යාව, උණ, වෛරස් උණ හා ඊට අමතරව ළමා හතිය, පාචනය සහ ඩෙංගු උණ ව්‍යාප්ත වී ඇති බවත්, මීට අමතරව අත්පා මුඛ රෝගද ව්‍යාප්ත වෙමින් ඇති බවයි ඔහු සඳහන් කළේ.
මේ හේතුවෙන් කැස්ස, සෙම්ප්‍රතිශ්‍යාව, උණ ඇති දරුවන් මෙන්ම කට වටා සහ අත්වල රතු ලප ඇති වුවහොත් එම දරුවන්ට අත්පා මුඛ රෝගය වැළඳි තිබීමට හැකි නිසා එම දරුවන් නිවෙස්වල තබා ගන්නා ලෙසයි විශේෂඥ වෛද්‍යවරයා ඉල්ලා සිටින්නේ.
එසේම පාචනය අවම කර ගැනීම සඳහා පිරිසිදු ජලය, පිරිසිදු ආහාර දරුවන්ට ලබාදෙන ලෙසත් අත් හොඳින් පිරිසිදු කරගත යුතු බවයි ළමා රෝග විශේෂඥ වෛද්‍ය දීපාල් පෙරේරා වැඩිදුරටත් සඳහන් කළේ.
