පිහියෙන් ඇන අයකු මැරූ හිටපු සෙබළාට මරණ දඬුවමට
Sunday, 31 March 2024 - 8:11 am
පිහියකින් ඇන පුද්ගලයකු ඝාතනය කිරීමේ සිද්ධියක් සම්බන්ධයෙන් මහාධිකරණය හමුවේ අධි චෝදනා ලැබ සිටි හිටපු යුද හමුදා සෙබළකු එකී චෝදනාවට වරදකරු බවට තීන්දු කල පොලොන්නරුව මහාධිකරණ විනිසුරු රුචිර වැලිවත්ත ඔහුට මරණීය දණ්ඩනය නියම කළේය.
මෙසේ මරණ දඬුවම නියම වූයේ රත්තොට පොල්වත්ත, රත්නවමලේ පදිංචිකරුවකු වන එම්.ජී. අජිත් කුමාර නමැති ශ්‍රී ලංකා යුද හමුදාවේ 19 වැනි සිංහ රෙජිමේන්තුවේ හිටපු සෙබළකුටය. මේ විත්තිකරු සක්‍රිය යුද හමුදා සේවයේ නිරතව සිටියදී නිවාඩු ලබා පැමිණ සිටි අතරවාරයේ මේ ඝාතනය කර ඇති බව අධිකරණ නඩු විභාගයේදී අනාවරණය විය.
විත්තිකාර හිටපු යුද හමුදා සෙබළාට දඬුවම් නියම කරමින් පොලොන්නරුව මහාධිකරණ විනිසුරු රුචිර වැලිවත්ත විවෘත අධිකරණය අමතමින් කියා සිටියේ විත්තිකරුට එරෙහි පැමිණිල්ල විසින් නඟා ඇති චෝදනා සාධාරණ සැකයෙන් ඔබ්බට ඔප්පු කිරීමට පැමිණිලි පාර්ශ්වය සමත්ව ඇති බවයි.
ඒ අනුව ජනාධිපතිවරයා නියම කරනු ලබන දිනයක හා වේලාවක සිර ගෙදරදී විත්තිකරුගේ ප්‍රාණය නිරුද්ධ වන තුරු එල්ලා මරන ලෙසට තමා නියෝග කරන බවද මහාධිකරණ විනිසුරු රුචිර වැලිවත්ත දී ඇති නියෝගයේ සඳහන්ය.
2013 වසරේ ජනවාරි මස 28 දින හෝ ඊට ආසන්න දිනයක පොලොන්නරුව මහාධිකරණ බල ප්‍රදේශයට අයත් හිඟුරක්ගොඩදි ගල්අමුණ මුල්කිරිගම, අංක 442, ලිපිනයේ පදිංචිව සිටි කේ.එච්. අමිල සමරකෝන් යන අයට පිහියකින් ඇන, බරපතළ තුවාල සිදු කර ඔහු ඝාතනය කළ බවට මේ විත්තිකරුට එරෙහිව නීතිපතිවරයා විසින්, ලංකා දණ්ඩ නීති සංග්‍රහයේ 296 වන වගන්තිය ප්‍රකාරව පොලොන්නරුව මහාධිකරණය හමුවේ අධි චෝදනා ගොනු කොට තිබිණි.
මේ නඩුවේ ලඝු නොවන මූලික විභාගය හිඟුරක්ගොඩ මහෙස්ත්‍රාත් අධිකරණය හමුවේ පැවැති අතර, නීතිපතිවරයා විසින් විත්තිකරුට අධි චෝදනා ගොනු කිරීමෙන් අනතුරුව වැඩිදුර විභාගය සඳහා පොලොන්නරුව මහාධිකරණයට යොමු කර තිබිණි. පැමිණිල්ල වෙනුවෙන් රජයේ අධිනීතිඥ මුසර්ලයි මහතා සහ විත්තිකරු වෙනුවෙන් නීතිඥ චන්දික තිලකරත්න පෙනී සිටියහ.
.webp)
.webp)
