රජයේ මූල්‍ය ක්‍රමෝපාය පාර්ලිමේන්තුවට
Tuesday, 01 July 2025 - 9:53 am
කොටස් දෙකකින් යුක්ත වන මූල්‍ය ක්‍රමෝපාය ප්‍රකාශය ජනතාවගේ දැනගැනීම සඳහා මුදල් අමාත්‍යාංශයේ වෙබ් අඩවිය මඟින් ප්‍රසිද්ධියට පත් කරන බව කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත මහතා පාර්ලිමේන්තුවේදී ඊයේ (30) පැවැසීය.
මධ්‍ය කාලීන මාර්ග සිතියමක් වන මෙම ප්‍රකාශය මඟින් රාජ්‍ය මූල්‍ය කළමනාකරණය තුළින් ළඟා කර ගත යුතු සංඛ්‍යාත්මක ඉලක්ක විස්තරාත්මකව සාකච්ඡා කරන බව ද අමාත්‍යවරයා පැවසුවේය. 2024 අංක 44 දරන රාජ්‍ය මූල්‍ය කළමනාකරණ පනතේ 11 වැනි වගන්තිය ප්‍රකාරව ‘මූල්‍ය ක්‍රමෝපාය ප්‍රකාශය’ ආණ්ඩුව විසින් ඊයේ (30) පාර්ලිමේන්තුවට නිවේදනය කිරීමෙන් අනතුරුව ඒ පිළිබඳ සභාව කල්තැබීමේ විවාදයට එක්වෙමින් ඇමැතිවරයා මේ බව ප්‍රකාශ කළේය. 2024 අංක 44 දරන රාජ්‍ය මූල්‍ය කළමනාකරණ පනතේ 11 වැනි වගන්තිය ප්‍රකාරව එක් එක් වර්ෂයේ ජූනි 30 හෝ එදිනට පෙර ආණ්ඩුව විසින් මූල්‍ය ක්‍රමෝපාය ප්‍රකාශයක් නිවේදනය කිරීමේ අවශ්‍යතාව සම්පූර්ණ කිරීම සඳහා මෙසේ පාර්ලිමේන්තුව විශේෂ පාර්ලිමේන්තු දිනයක් ලෙස රැස්විණි.
මේ අනුව මුදල්, ක්‍රමසම්පාදන සහ ආර්ථික සංවර්ධන අමාත්‍යවරයා වෙනුවෙන් කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත මහතා විසින් මෙම ‘මූල්‍ය ක්‍රමෝපාය ප්‍රකාශය’ පාර්ලිමේන්තුවට නිවේදනය කළේය. මීට අදාළ සභාව කල්තැබීමේ යෝජනාව පාර්ලිමේන්තු මන්ත්‍රිනි ආචාර්ය කෞෂල්‍යා ආරියරත්න මෙනෙවිය විසින් ඉදිරිපත් කිරීමෙන් අනතුරුව පක්ෂ විපක්ෂ මන්ත්‍රීවරු රැසක් ප.ව 4.45 දක්වා පැවැති සභාව කල්තැබීමේ විවාදයට එක්වෙමින් සිය අදහස් පළ කළහ. ඉන්පසු පාර්ලිමේන්තුව ජූලි 8 වැනි අඟහරුවාදා පෙ.ව 9.30 දක්වා කල් තැබිණි.
ස්වර්ණා විජේකෝන්, මහින්ද අලුත්ගෙදර, සන්ධ්‍යා කරුණාරත්න
.webp)
