ජනපති සහ සමස්ත ලංකා ජම්ඉයියතුල් උලමා සංවිධානය අතර හමුවක්
Thursday, 29 August 2024 - 9:01 am
කොළඹ මාලිගාවත්තේ පිහිටි සමස්ත ලංකා ජම්ඉයියතුල් උලමා සංවිධානයේ මූලස්ථානය වෙත පැමිණි ජනාධිපති රනිල් වික්‍රමසිංහ මහතා එහි සභාපති අෂ්-ෂෙයික් එම්. අයි. එම්. රිස්වි මවුලවිතුමා ඇතුළු විධායක මණ්ඩලය සමඟ පෙරේදා (27) පස්වරුවේ සාකච්ඡාවකට එක් විය.
සමස්ත ලංකා ජම්ඉයියතුල් උලමා සංවිධානයේ මහ ලේකම් අෂ්-ෂෙයික් අක්‍රම් නූරාමිත්, භාණ්ඩාගාරික අෂ්-ෂෙයික් ආචාර්ය ඒ. ඒ. අහමද් අස්වර්, උපසභාපති අෂ්-ෂෙයික් එච්.ඔමාර්දීන්, අෂ්-ෂෙයික් එම්. ජේ. අබ්දුල් ඛාලික්, උපසභාපති අෂ්-ෂෙයික් අයි. එල්. එම්. හෂීම්, උප සභාපති අෂ්-ෂෙයික් ඒ. එල්. එම්. ඛලීල් යන මවුලවිවරුන් ප්‍රමුඛ විධායක සභාවේ සාමාජිකයන් මේ අවස්ථාවට එක්ව සිටි අතර, එළඹෙන ජනාධිපතිවරණයේදී ජනාධිපති රනිල් වික්‍රමසිංහ මහතාගේ ජයග්‍රහණය වෙනුවෙන් මවුලවිවරු මෙහිදී සිය ආශීර්වාදය පළ කළහ.
මේ හමුවේදී කෙරුණු ඉල්ලීමට ප්‍රතිචාර දක්වමින් ජනාධිපතිවරයා කියා සිටියේ පසුගිය කොරෝනා සමයේ මියගිය මුස්ලිම්වරුන් ඇතුළු සෙසු ආගමිකයන් ආදාහනය කිරීමට රජයට නිර්දේශ කළ පාර්ශ්ව සතුව පවතින වගවීම පිළිබඳ සොයා බලා කටයුතු කිරීමට සෙසු පක්ෂ නායකයන් සමඟද සාකච්ඡා කර පාර්ලිමේන්තු තේරීම් කාරක සභාවක් පත් කිරීමට තමා යෝජනා කරන බවයි. මේ වන විට රටේ සිදුව තිබෙන ආර්ථික ප්‍රකෘතිමත්භාවය සහ ඉදිරි සැලසුම් පිළිබඳවද මෙහිදී මවුලවිතුමන්ලා දැනුවත් කළ ජනාධිපතිවරයා තමා මෙවර ජනාධිපතිවරණයට ඉදිරිපත් වන්නේ ඒ වැඩපිළිවෙළ ඉදිරියට ගෙන යඑෑම වෙනුවෙන් ජනවරම ඉල්ලා සිටීමට බවද පැවසීය. තම මැතිවරණ කටයුතු ආරම්භ කිරීමෙන් පසුව මහනාහිමිවරුන් මෙන්ම සෙසු ආගමික පූජකවරුන්ද හමු වී අවවාද අනුශාසනා ලද බව පැවසූ ජනාධිපති රනිල් වික්‍රමසිංහ මහතා සියලු ආගම්වලට සමාන කොට සැලකීමට තමා කැප වී සිටින බවද සඳහන් කළේය. පලස්තීන ගැටලුව පිළිබඳවද මෙහිදී අදහස් දැක්වූ ජනාධිපතිවරයා සඳහන් කළේ පලස්තීන රාජ්‍යය සම්බන්ධයෙන් ශ්‍රී ලංකා රජයේ ස්ථාවරයේ කිසිදු වෙනසක් නැති බවත්, ඒ වෙනුවෙන් පෙනී සිටින බවත්ය. ලක් රජය විසින් ජෙරුසෙලමෙහි නව කොන්සල් කාර්යාලයක් විවෘත කළ බවට පැතිර යන ප්‍රචාර අසත්‍ය බවත්, ඊශ්‍රායලයේ සේවය කරන ශ්‍රී ලාංකිකයන් වෙත අවශ්‍ය සේවා සැපයීම සඳහා 2000 වසරේ සිට ශ්‍රී ලංකාව ඊශ්‍රායලය තුළ තානාපති සේවා පවත්වාගෙන යන බවත් ජනාධිපති රනිල් වික්‍රමසිංහ මහතා මෙහිදී සඳහන් කළේය.
හිටපු අමාත්‍යවරුන් වන ඒ.එච්.එම්. ෆවුසි, ෆයිසර් මුස්තාපා, හිටපු ආණ්ඩුකාර අසාද් සාලි යන මහත්වරුන් ඇතුළු පිරිසක්ද මේ අවස්ථාවට එක්ව සිටියහ.
