2024 අයවැය කාරක සභා අවස්ථාවේ විවාදයේ පළමු දිනය වන අද දින විවාදයට එක්වෙමින් නිමල් සිරිපාල අමාත්‍යවරයා මේ බව පැවසීය.

වැඩිදුරටත් අදහස් දැක් වූ අමාත්‍යවරයා පෙන්වා දුන්නේ මෙම මැතිවරණ ක්‍රමය නිසා ඇති වී තිබෙන සමාජ බලපෑම් ගැන වරින් වර කතිකාවත් රාශියක් ඇති වී තිබෙන බවයි.

අප සියළු දෙනා එක්ව ජනතා අභිලාශය ඉටු කරන ව්‍යවස්ථා සංශෝධනය කළ යුතු වෙනවා.තමන් ජීවත් වන ප්‍රෙද්ශයට වග කියන මන්ත්‍රීවරයෙක් පත් කරන මැතිවරණ ක්‍රමයක් අවශ්‍යයි කියලා කියනවා. සමානුපාතික ඡන්ද ක්‍රමයක් තමයි අපට ලබා දී තිබෙන්නේ. මෙම මැතිවරණය ක්‍රමය ලංකාවට ගැළපෙන මැතිවරණ ක්‍රමයක් නොවේ.එම නිසා මිශ්‍ර මැතිවරණ ක්‍රමයක් අවශ්‍යයි. මිශ්‍ර මැතිවරණයක් ඇති කිරීම සඳහා මීට වසර ගණනාවකට පෙර පැවති තේරී කාරක සභාවෙනතුත් පැහැදිළි මගපෙන්වීමක් හදලා තිබෙනවා.

ලබන වසරේ පාර්ලිමේන්තු මැතිවරණයක් තියෙනවා කියලා ජනාධිපතිවරය ප්‍රකාශ කළා. පාර්ලිමේන්තු මැතිවරණයක් පමණක් නොවෙයි. පළාත් සභා සහ ප්‍රාෙද්ශීය සභා සඳහාද සුදුසු මැතිවරණ ක්‍රමයක් සැකසීම යුගයේ අවශ්‍යතාවයක්.

පාර්ලිමේන්තුවේ ක්‍රියාකාරිත්වය සම්බන්ධයෙන්ද ජනතාව තුළ තිබෙන්නේ බොහෝ කලකිරිමක් ඇති වී ඇතැයි අමාත්‍යවරයා පෙන්වා දුන්නේය.

ජනතා නියෝජිතයින් වශයෙන් තමන්ගේ ප්‍රතිපත්ති සහ ඉදිරි වැඩපිළිවෙළ සම්බන්ධයෙන් පාර්ලිමේන්තු මන්ත්‍රීවරු පාර්ලිමේන්තුව තුළදී සාකච්ඡා නොකරන බවක් දැකිය හැකි බව පෙන්වා දුන් අමාත්‍යවරයා සැම දෙනාම එකම කරුණ දස පාරක් හෝ කියමින් මාධ්‍ය තුළ වීරයින් වීමට උත්සාහ දරනවා මිස පාර්ලිමේතුවේ ගුණාත්මක භාවය ජනතාවට පෙන්වීමට උත්සාහ දරන බවක් නොපෙනෙන බවද කීය.

පාර්ලිමේන්තුවේ කතා කළ යුතු ක්‍රමවේද සම්ප්‍රදායක් තිබෙනවා. එම නිසා ඉදිරියේදී පාර්ලිමේන්තුවේ පළමු පැය මාධ්‍ය සන්දර්ශන පවත්වන අයටත් අනතුරුව නීති සම්පාදනය සහ රටේ පරිපාල න කටයුතු සම්බන්ධයෙන් වෙන් කර ගත යුතුයි . එසේ නොමැති වුවහොත් පාර්ලිමේන්තුව සම්බන්ධයෙන් ජනතාව තුළ පවතින විශ්වාසය බිඳි යන්න පුළුවන්.