පුංචි ඡන්දයේ නාමයෝජනා ගැන නීතිපතිගෙන් උපදෙස් ගනී
Saturday, 31 August 2024 - 8:29 am
ඉදිරියේදී පැවැත්වීමට නියමිත පළාත් පාලන මැතිවරණයේ නාමයෝජනා පත්‍ර සම්බන්ධයෙන් ගත යුතු ක්‍රියාමාර්ග පිළිබඳව නීතිපතිවරයාගෙන් උපදෙස් ලබා ගැනීමට පළාත් සභා හා පළාත් පාලන අමාත්‍යාංශය තීරණය කර ඇත.
ඉකුත් 2022 වසරේදී පළාත් පාලන මැතිවරණය ප්‍රකාශයට පත් කර නාමයෝජනා කැඳවූ අතර එහි ඡන්ද විමසීම 2023 මාර්තු මාසයේ දී පැවැත්වීමට එවකට මැතිවරණ කොමිසම තීරණය කළේය. එහෙත් මැතිවරණයට අවශ්‍ය මුදල් වෙන් නොවීම හේතුවෙන් මැතිවරණය මේ දක්වා නොපැවැත්විණි.
2022 දී කැඳවූ විවිධ පක්ෂවල නාමයෝජනා පත්‍රවල ඇතුළත් අපේක්ෂකයන් රැසක් මේ වන විට පක්ෂ හැර ගොස් වෙනත් පක්ෂ සමග එක් වී ඇති බවත් තවත් අපේක්ෂකයන් පිරිසක් මියගොස් ඇති බවත් පළාත් පාලන අමාත්‍යාංශය සඳහන් කරයි.
එමෙන්ම ඡන්ද දායකයන් ද එදාට වඩා ලක්ෂ ගණනක් අලුතින් එක්ව ඇති නිසා ඔවුන්ට අසාධාරණයක් වන බවද මේ පිළිබඳව ඉදිරියේදී ගත යුතු ක්‍රියාමාර්ග නීතිපතිවරයා ගෙන් බලාපොරොත්තු වන බවද රාජ්‍ය ඇමැති ජානක වක්කුඹුර මහතා පැවසීය.
