බූස්ස අධි ආරක්ෂිත බන්ධනාගාරයේ හදිසි සෝදිසියක්
Saturday, 13 July 2024 - 5:15 pm
බූස්ස අධි ආරක්ෂිත බන්ධනාගාරයේ පෙරේදා (11) රාත්‍රී 10.25 සිට ඊයේ (12) අලුයම දක්වා බන්ධනාගාර හදිසි ප්‍රතිචාර හා උපක්‍රමික බළකා නිලධාරීන් විශේෂ කාර්ය බළකායේ නිලධාරීන් සමඟ එක්ව සිදු කළ සෝදිසි මෙහෙයුමකදී එම බන්ධනාගාරයේ විශේෂ ගණයේ සිරකරුවන් රඳවා සිටින A වාට්ටුවේ සිර කුටි 5ක තිබි ජංගම දුරකතන 6ක් ඇතුළු උපාංග හා මත්කුඩු පැකට් 2ක් ඇතුළු තහනම් ද්‍රව්‍ය රැසක් සොයාගෙන ඇත.
බන්ධනාගාර උපක්‍රමික බළකායේ (බුද්ධි අංශයේ) නිලධාරීන් සහ විශේෂ කාර්ය බළකායෙහි නිලධාරීන් 70ක පමණ කණ්ඩායමක් සිර මැදිරි 40කට අධික ප්‍රමාණයක් පූර්ණ පරීක්ෂාවකට ලක් කර ඇති අතර, එහිදී ප්‍රබල මත්ද්‍රව්‍ය ජාවාරම්කරුවන් සහ අපරාධකරුවන් ලෙස නම් දැරෑ කුඩු සලිඳු, බස් රසික, වෙලේ සුදා, මිදිගම චූටි, හයිබ්‍රිඩ් සුද්දා ඇතුළු පිරිසක් රඳවා සිටින සිර මැදිරිවලින් මේ ජංගම දුරකතන ඇතුළු උපාංග සොයාගැනීමට හැකි වූ බව අනාවරණය වේ.
සොයාගත් තහනම් ද්‍රව්‍ය අතර ජංගම දුරකතන 6ක් (මෙයින් 3ක් Smart Phone වේ. ජංගම දුරකතන 2 ක් හානි වූ ඒවාය) චාජර් 5ක්, ඩේටා කේබල් 4ක් සිම් කාඩ්පතක්, Memory Card 4ක්, හෑන්ඩ් ෆ්‍රී 6 (බ්ලුටූත් හෑන්ඩ් ෆ්‍රී 1ක් සමඟ) මත්කුඩු පැකට් 2ක් හා දුම්කොළයක්ද වන බව බන්ධනාගාර ආරංචි මාර්ග කියයි. අත්අඩංගුවට ගත් තහනම් ද්‍රව්‍ය සම්බන්ධයෙන් ඉදිරි විමර්ශන කටයුතු බන්ධනාගාර දෙපාර්තමේන්තුව විසින් මේ වන විට සිදු කරමින් පවතී.
.webp)
