මැ.කො. තීන්දුව ශ්‍රෙෂ්ඨාධිකරණය අත්හිටුවයි.. මැතිවරණයට තරග කරන්න අවසර..
Monday, 14 October 2024 - 9:10 am
කලින් ” සිංහල රාවය” නමින් හැඳින්වූ ලංකා ජාතික පක්ෂයේ කටයුතු අත්හිටුවීමට මැතිවරණ කොමිසම ගත් තීරණය අත්හිටුවීමට නියෝග කළ ශ්‍රේෂ්ඨාධිකරණය එම පක්ෂයට මෙවර මහ මැතිවරණය සඳහා තරග කිරීමට අවසර දුන්නේය.
ශ්‍රේෂ්ඨාධිකරණය මෙසේ අවසර දුන්නේ එම පක්ෂයේ මහ ලේකම් සාලික පෙරේරා මහතා ගොනුකර තිබූ පෙත්සමක් සලකා බැලීමෙන් පසුවය.
මෙම පෙත්සම වැඩ බලන අගවිනිසුරු මුර්දු ප්‍රනාන්දු, ශ්‍රේෂ්ඨාධිකරණ විනිසුරුවන් වන දිලිප් නවාස් සහ ජනක් ද සිල්වා යන මහත්ම මහත්මින්ගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් හමුවේ සලකා බැලිණි.
මෙම පෙත්සමේ වග උත්තරකරුවන් වශයෙන් මැතිවරණ කොමිසම ඇතුළු පිරිසක් නම්කරනු ලැබ සිටිති.
මෙම පක්ෂයේ සභාපති වන අක්මීමන දයාරතන හිමියන් සහ විධායක කමිටුව අතර ඇති වූ අර්බුදයක් හේතුවෙන් පක්ෂයේ කටයුතු අත්හිටුවීමට මැතිවරණ කොමිසම තීරණය කර තිබිණැයි සඳහන් වේ.
එම තීරණය නීතියට පටහැනි බවත් ඒ හේතුවෙන් තම පක්ෂයට ඉදිරි මහ මැතිවරණයට තරග කිරීමට නොහැකි වන තත්වයක් උදාවී ඇති බැවින් මෙම තීරණය බල රහිත කරන නියෝගයක් නිකුත් කරන ලෙස පෙත්සම්කරු සිය පෙත්සමෙන් ඉල්ලා සිටියේය.
පෙත්සම්කරු වෙනුවෙන් නීතිඥ හෆීල් ෆාරිස් මහතා පෙනී සිටියේය.
නීතිපති වෙනුවෙන් නියෝජ්‍ය සොලිසිටර් ජනරාල් යුරේෂා ද සිල්වා මහත්මිය පෙනී සිටියාය.
