ජනතා විමුක්ති පෙරමුණ විසින් ඝාතනය කළ හැටදහසක් වෙනුවෙන් කිසිම ස්මාරකයක් ඉදිකර නැත - සුගීෂ්වර බණ්ඩාර
Thursday, 20 June 2024 - 7:58 am
ජනතා විමුක්ති පෙරමුණ විසින් ඝාතනය කළ මේ රටේ හැටදහසක් වෙනුවෙන් අද වනතුරු කිසිම ස්මාරකයක් ඉදිකර නැතැයි නව ජනතා පෙරමුණේ නායක සුගීෂ්වර බණ්ඩාර මහතා ප්‍රකාශ කළේය.
එළාර, පෘතුගීසින්, ලන්දේසින්, ඉංග්‍රීසින් යුද්ධය වෙනුවෙන් මියගිය විරෝධාර රණවිරුවන් වෙනුවෙන් ස්මාරක ඉදිකර තිබෙන නමුත් ජනතා විමුක්ති පෙරමුණෙන් ඝාතනය කරපු හැටදහසක් වෙනුවෙන් අද වනතුරු එක ස්මාරකයක් හෝ ඉදිකර නැති බව ද ජවිපෙ නායකයන් උජාරුවට ඉල්මහ විරුවන් සමරන බව ද පෙන්වා දුන්නේය.
අලුතින් හිතමු ජාතික සාමූහිකයේ පාණදුර දී පැවති සම්මන්ත්‍රණයට එක්වෙමින් සුගීෂ්වර බණ්ඩාර මහතා මේ බව සඳහන් කළේය.
එහිදී වැඩිදුරටත් ඒ මහතා මෙසේ ද පැවසීය.
“ලෝකේ 19 වැනි ශතවර්ෂය ගත්තොත් ඒ කාලේ කඳවුරු දෙකක් තිබුණා. එකක් ධනවාදී බල කඳවුර, අනික සමාජවාදී බල කඳවුර, අපේ රටත් විටෙක ධනවාදී බල කඳවුරට පක්ෂවත්, විටෙක සමාජවාදී බල කඳවුරට පක්ෂවත් 75 වසරක් විවිධ පිරිස් රට පාලනය කළා. හැබැයි බටහිර රටවල්වලට අවශ්‍ය වුණාම රටවල් ආර්ථික වශයෙන්, උපාය මාර්ගික වශයෙන් වට්ටවන්න ඔවුන් විවිධ බළල් අත් යොදවනවා. ජනතා විමුක්ති පෙරමුණ කියන්නෙත් අපේ රට වට්ටන්න, අපේ රට උපායමාර්ගිකව අරාජික කරන්න, අපේ රට විනාශ කරන්න බටහිරින් හෝ වෙනත් කවුරුහරි හදපු බළල් අතක් විදිහට මම දකිනවා.
අද අනුර කුමාර දිසානායක මහත්තයා, ලාල්කාන්ත මහත්තයා කියනවා දහතුන් වන ආණ්ඩුක්‍රම ව්‍යවස්ථාව දැන් ජාතික ව්‍යුහයේ එක කොටසක් වෙලා තිබෙනවා. ඒක නිසා අපේ ආණ්ඩුවක් යටතේ පළාත් සභා මැතිවරණ පවත්වනවා කියලා. අවුරුදු 35කට පස්සේ තමයි ජනතා විමුක්ති පෙරමුණට තේරෙන්නේ එදා ජයවර්ධන ජනාධිපති ක්‍රියාත්මක කළ උපායමාර්ගික ක්‍රියාවලිය හරි කියලා. හැබැයි ඒ වෙනුවෙන් හතළිස්දහසක් තරුණ ජීවිත විනාශ වුණා. ඒ වෙනුවෙන් බස් රථ ගිනි තිබ්බා. කර්මාන්තශාලා ගිනි තිබ්බා. ට්‍රාන්ස්ෆෝමර් ගිනි තිබ්බා. ඒ සිදු කරපු විනාශය ගැන රටට සිදු කළ පාඩුව ගැන අද කතා නෑ. අද අනුර කුමාර මහත්තයා ලාල් කාන්ත, බිමල් රත්නායක, හඳුන්නෙත්ති ලෝකේ වටේ ගිහින් සොරි කිව්වට හරියන්නේ නෑ. මේවට සාධාරණයක් වෙන්න ඕනෑ.
මම වගේ පිය සෙනෙහස අහිමි වෙච්ච දරුවෝ කී දෙනෙක් මේ රටේ ඉන්නව ද? මොකක්ද ඔවුන්ට වුණු සාධාරණය. ඒ නිසා අපි කියනවා ආණ්ඩුවට අපට කොළඹින් පර්චස් දෙකක් දෙන්න. එදා ජවිපෙ විසින් ඝාතනය කළ අහිංසක ජීවිත සිහිපත් කරන්න ස්මාරකයක් හදන්න.
ජවිපෙ නියෝජනය කරන ජාතික ජන බලවේගයට ඡන්දය දුන්නොත් නැවත මේ රටේ ප්‍රජාතන්ත්‍රවාදයක් නෑ.බැලට් එකෙන් පාලකයෙක් පත්කර ගන්න වෙන එකක් නෑ.බුලට් එකෙන් තමයි රට පාලනය වෙන්නේ.ඒ වගේම සුදු ඇදගෙන රට හමුවේ පෙනී සිටින බොරු ජාතිකවාදීන්ට රැවටෙන්න එපා කියා ඉල්ලනවා.
යථාර්ථය නිවැරදිව තේරුම් ගෙන ජාත්‍යන්තරයේ සහයෝගයෙන් නිසි ආර්ථික කළමනාකරණයක් කරන්න පුළුවන්. අර්බුදයට සැබෑ විසඳුම් දෙන්න පුළුවන් නායකයෙක් 2024 ජනාධිපතිවරණයේ පත් කරගනිමුයැයි ඉල්ලා සිටිනවා.”
.webp)
