Local

වාහන ආනයනයට කිසිම සූදානමක් නෑ.. බැංකුවලට කිසිම දැනුම් දීමක් නෑ..

Wednesday, 09 October 2024 - 10:48 am

ඔක්තෝබර් මාසයේ සිට වාහන ආනයනය කිරීමට අවසර ලබා දීමට සූදානම් බවට මීට පෙර රජය පැවසුවත් ඒ පිළිබඳව නිශ්චිත තොරතුරක් නැති බව ශ්‍රී ලංකා වාහන ආනයනකරුවන්ගේ සංගමය සඳහන් කරයි.

එහි සභාපති ප්‍රසාද් මානගේ මහතා මාධ්‍ය හමුවක් අමතමින් කියා සිටියේ ඔක්තෝබර් 01 සිට බස් හා ලොරි රථ ආනයනය කිරීමට ඉඩ දෙන බවට රාවයක් යන නමුත් එවැනි කිසිදු චක්‍රලේඛයක් හෝ කිසිදු පිළිගත හැකි ලියවිල්ලක් රජයේ ආයතනයකින් ආනයන පාලක හෝ බැංකු වෙත යවා ඇති බවය.

වාහන ආනයනය කිරීමට වර්තමාන රජය කිසිදු තීන්දුවක් ගෙන නැති බව රාජ්‍ය නිලධාරීන් සමඟ සාකච්ඡා කිරීමෙන් තම සංගමයට දැන ගැනීමට හැකි වූ බවත් ඔහු පැවැසීය.

මීට පෙර 2020 වාහන ආනයන කළ කාලයේ වූ මිලට නැවත වාහන ආනයන කිරීමට හැකි බවක් විශ්වාස කළ නොහැකි යැයිද ඒ මහතා පැවැසීය.

මේ අනුව වාහන ආනයන කළත් මිල ගණන්වල විශාල පහත යෑමක් නොවනු ඇති බවත් ඔහු කීය.

පසුගිය 2020 ට වඩා රුපියලට සාපේක්ෂව ඩොලරය සියයට 80කින් පමණ අතිප්‍රමාණය වීම මීට හේතුව බවත් ඔහු පැවැසීය.