Local

මූල්‍ය වංචාවට අත්අඩංගුවට ගත් යුවළ රිමාන්ඩ්

Sunday, 28 January 2024 - 6:32 pm

ගලෙන්බිඳුනුවැව ප්‍රදේශයේ ජනතාවගෙන් රුපියල් කෝටි 500ක් වංචා කිරීම සම්බන්ධයෙන් අත්අඩංගුවට ගත් යුවළ රිමාන්ඩ් බන්ධනාගාර ගතකර තිබේ.

සැකකරු සහ සැකකාරිය අද (28) කහටගස්දිගිලිය වැඩබලන මහේස්ත්‍රාත්වරයා හමුවට ඉදිරිපත් කර ඇත.

එහිදී නියෝග කර ඇත්තේ ඔවුන් එළැඹෙන 5වනදා දක්වා රක්ෂිත බණ්ධනාගාරගත කිරීමටය.

වැඩි පොලියක් ලබාදෙන බව පවසා ගලෙන්බිඳුනුවැව ප්‍රදේශයේ ජනතාවගෙන් රුපියල් කෝටි 500ක් වංචා කිරීම සම්බන්ධයෙන් පුද්ගලයෙකු හා ඔහුගේ අනියම් බිරිඳ නීතිවිරෝධී වත්කම් විමර්ශන කොට්ඨාසයේ ජාලගත වංචා විමර්ශන ඒකකය මගින් අත්අඩංගුවට ගත්තේය.

එම පුද්ගලයා මුදල් වංචා කර ඇත්තේ ගලෙන්බිඳුනුවැව ප්‍රදේශයේ 'ට්‍රෙඩ්වින් ෂෙයාර්' නම් පීරමීඩාකාර මූල්‍ය ආයතනයක් පවත්වාගෙන යමිනි.

මුදල් වංචා කිරීමෙන් පසු මහනුවර පිළිමතලාව ප්‍රදේශයේ සිය අනියම් බිරිඳ සමග රැඳී සිට ඇති ඔහු ජනතාවගෙන් වංචා කළ මුදලින් ඉඩකඩම්, වාහන මිලදීගෙන අධි සුඛෝපභෝගි ජීවිතයක් ගත කර ඇති බව වාර්තා වෙයි.

එසේම අනියම් බිරිඳගේ නමින් රුපියල් ලක්ෂ 80ක් ස්ථිර තැන්පතුවක්ද පවත්වාගෙන ගොස් තිබේ.

ඒ අනුව ඔහුගේ අනියම් බිරිඳ අත්අඩංගුවට ගැනුණේ වංචා කළ මුදල් ආයෝජනය කිරීමේ චෝදනාව මතය.