සෑම හමුදා කඳවුරකම රණවිරු සුබසාධන අංශයක් අරඹන්න
Monday, 26 May 2025 - 4:48 pm
රණවිරුවන්ගේ සුබසාධනය වෙනුවෙන් දිවයිනේ සෑම හමුදා කඳවුරකම රණවිරු සුබසාධන අංශ ඇරඹේ.
ශ්‍රී ලංකා යුද හමුදාව විශ්‍රාමික, ආබාධිත රණවිරුවන් හා මියගිය රණවිරුවන්ගේ පවුල්වල සාමාජිකයන් වෙත ලබාදෙන සුබසාධන කටයුතු වඩාත් පුළුල් හා විධිමත්ව සිදු කිරීම සඳහා යුද හමුදාපති ලුතිනන් ජෙනරාල් ලසන්ත රොද්‍රිගෝ මහතාගේ උපදෙස් මත දිවයිනේ සෑම හමුදා කඳවුරකම රණවිරු සම්බන්ධීකරණ අංශයක් පිහිටුවීමට කටයුතු කර ඇත.
දිවයින පුරා පිහිටි සෑම යුද හමුදා කඳවුරකම එහි අණදෙන නිලධාරීවරයාගේ අධීක්ෂණය යටතේ මෙම රණවිරු සම්බන්ධීකරණ අංශ පිහිටුවා ඇති අතර, එය 2025 මැයි මස 26 වැනි දින සිට ක්‍රියාත්මකය.
ඒ අනුව යුද හමුදාවේ විශ්‍රාමික, ආබාධිත සහ මියගිය රණවිරුවන් සබැඳි වැටුප් විෂමතා, සෞඛ්‍ය ඇතුළු අනෙකුත් සුබසාධන ගැටලු අදාළ යුද හමුදා සාමාජිකයා පදිංචි ස්ථානයට ආසන්නතම යුද හමුදා කඳවුරේ රණවිරු සම්බන්ධීකරණ අංශයට යොමු කළ හැකිය.
අදාළ රණවිරු සම්බන්ධීකරණ අංශය එම ගැටලුව යුද හමුදා මූලස්ථානය සහ අනෙකුත් ආයතන වෙත යොමු කර වඩාත් කඩිනමින් එම ගැටලු විසඳීමට කටයුතු කරනු ඇත.
විශ්‍රාමික, ආබාධිත රණවිරුවන් හා මියගිය රණවිරුවන්ගේ පවුල්වල සාමාජිකයන් හට තම ගැටලු හමුදා මූලස්ථානය සහ ඔවුන් අයත් රෙජිමේන්තුව වෙත පැමිණ ඉදිරිපත් කිරීමේදී ඇති වන ප්‍රායෝගික අපහසුතාවන් සැලකිල්ලට ගනිමින් මෙම පියවර ගෙන තිබේ.
රක්ෂණ ශ්‍රියන්ත
.webp)
