Local

කැස්බෑව ඉන්ධන හලේ ගින්න තත්පර 25න් නිවා දමයි

Wednesday, 17 January 2024 - 10:54 am

කැස්බෑව නගරයේ ඉන්ධන පිරවුම්හලක තටාකයට බවුසරයකින් (15) දහවල් ඉන්ධන ගොඩබාමින් සිටියදී හදිසියේ ගින්නක් ඇතිවී සිදුවීමට ගිය විශාල විනාශයක් තත්පර 25ක සුළු කාලයක් තුළ මැඬපැවැත්වීමට එහි සේවකයන් ප්‍රමුඛ කණ්ඩායමකට හැකි වී ඇත.

ගින්නෙන් කිසිවෙකුටත් අනතුරක් නොවීය.

පෙට්‍රල් ඉන්ධන රැගෙන ආ බවුසරය තටාකය අසල නවතා ඉන්ධන යොමු කරමින් සිටියදී බවුසරයේ නළය හා තටාකයේ යකඩ බට අතර ගැටී අඩි පහළොවක් පමණ උසට ඒ තුළින් නැඟී ආ විශාල ගිනිදැල්ලක් බවුසරයේ ඉහළටම වන්නට හටගෙන ඇති බව ඛනිජ තෙල් සංස්ථාවේ ප්‍රකාශකයෙක් පැවසීය.

තෙල් ගොඩ බාන අතරවාරේ එම කටයුත්ත කෙරෙහි සුපරික්ෂාකාරීව සිටි බවුසරයේ රියැදුරු, සහායක සහ ඉන්ධන හලේ සේවකයන් ගින්න හට ගැනීමත් සමඟම බවුසරය එම ස්ථානයෙන් වහා ඉවත් කිරීමට පියවර ගැනීමත් සමඟම සෙසු සේවකයන් ගිනි නිවීමේ උපකරණ භාවිත කරමින් තටාකය තුළින් ඇවිළෙන ගින්න පැතිරීමට ඉඩ නොදී විනාඩි කිහිපයක් තුළදී නිවා දැමීමට කටයුතු කෙරිණි.

ගින්න හට ගන්නා අයුරු සහ ගින්න නිවා දැමීමට සේවකයන් යුහුසුලුව කටයුතු කරන අයුරු ඉන්ධන හලේ සීසීටීවී කැමරාවේ ද සටහන් වේ.