පන්ති කාඹරය නිර්මාණශීලිත්වය ඔප්නංවන තැනක් විය යුතුයි - අගමැති
Tuesday, 11 June 2024 - 5:34 am
ඇතැම් දරුවන් ටියුෂන් නොයන හෙයින් පාසල් අධ්‍යාපනය ඉතා වැදගත් බවත් අගමැති දිනේෂ් ගුණවර්ධන මහතා පැවැසීය.
කොට්ටාව උතුර, ධර්මපාල විද්‍යාලයේ ශ්‍රවණාගාරය සහ ගෘහස්ථ ක්‍රීඩාගාරය සිසු අයිතියට පත්කිරීමේ අවස්ථාවට ඊයේ (10) එක්වෙමින් අගමැතිවරයා මේ බව පැවසීය.
අගමැතිවරයා වැඩිදුරටත් මෙසේද පැවැසීය.
පාසල් පන්තිකාමරය තුළ දරුවන්ට විශ්වාසයෙන් හා සතුටෙන් ඉගෙනීමේ පරිසරය නිර්මාණය කළ යුතුයි. රාජ්‍ය පරිපාලන ඇමැතිවරයා කියන නාමයට වඩා තමන් මහරගම මන්ත්‍රීවරයා වශයෙන් ඉටුකළ සේවයට කැමැතියි.
ධර්මපාල යන නාමය ජාතියක ජීවයයි. ධර්මපාල මහා විද්‍යාලය සියක් වසරකට එහා ආරම්භ වී ධර්මපාලතුමන්ගේ අතිශය උතුම් ජාතික චින්තාව පාසලට එක් වෙන දරුවන් මඟින් අනාගතයට ගෙනයනවා. විශිෂ්ටයන් අතර අද බැබළෙනවා. එයින් පිට වෙන දරුවෝ පාසලේ ගෞරවය ජාතියට හිමිකාරීත්වය ලබාගත හැකි දැනුම සම්පූර්ණ වූ ක්‍රියාදාමයට එක්විය හැකි පුරවැසියන් බවට පත්වෙනවා. අපේ මවුපියෝ දීර්ඝ කාලයක් මේ සාර්ථකත්වය ගෙන ඒම සඳහා කරන ලද ඉල්ලීම් මා හොඳින් දන්නවා.
ගොඩනැඟිලි පමණක් නොව විවිධ ක්ෂේත්‍රයන්ට පිවිසිය හැකි පාඨමාලා වලින් පාසල් ශක්තිමත් කිරීම අනාගතයට යන දරු පරම්පරාවට අප ඇතිකර තිබෙන පදනමයි. අද මේ පාසලෙන් පළමු වරට උසස් පෙළ දරුවන් තිදෙනෙක් විශ්වවිද්‍යාලයට තේරීමට සුදුසුකම් ලබා තිබෙනවා. කොයිතරම් ආඩම්බරයක්ද. අද දරුවන් පෙන්වූ හැකියාව දක්ෂතාවය මනුෂ්‍යයෙක්ගේ ජීවිතයට සරල බවක් ඇතිකළ හැකි ඒ දායාදය පාසලෙන් පෙන්නුම් කරනවා. මේ පාසල කෙරෙහි මවුපියන් තබා තිබෙන විශ්වාසය පාසල ශක්තිමත් කිරීම සඳහා අඛණ්ඩ දායාදයක් වෙලා තිබෙනවා.
ධර්මපාලතුමාගේ කාලේ මේ පැත්තේ පොල් අතු මඩුවල පාසල් පැවතුණා. මවුපියෝ ගුරුවරු හැටියට ඇවිල්ලා ඒ වගේ උගන්නලා අපේ දරුවන්ට දියුණුවට ගමන් කළ හැකි දැනුම එකතු කළා. ඒ යුගයෙන් පස්සේ ඒ වගේ පාසල් ලංකාවේ දහස් ගණන් රාජ්‍ය පාසල් බවට පරිවර්තනය වුණා. එයින් ඉගෙන ගත් පිරිස අපේ රටේ විවිධ ක්ෂේත්‍රවල සහ විශ්වවිද්‍යාල හරහා රටට සේවය කරන්න පුළුවන් වුණා.
අපි අභියෝගාත්මක අනාගතයට යන්නේ. ඒ දරුවන් මුහුණ දෙන අනාගතයයි. දරුවන්ට ඒ අනාගතයට ගමන් කරන්නට පාසල් කාමරය තුළ විශ්වාසයෙන් යුතුව හා සතුටින් ඉගෙනීමේ පරිසරය අපි ඇති කළ යුතුයි. ඒ විශ්වාසය සතුට හා පූර්ණ දායාදය මත තමයි දරුවන් තවදුරටත් වර්ධනය වෙන්නේ. ලංකාවෙ පාසල්වල ඉගෙන ගන්න සියලු දරුවෝ ටියුෂන් යන්නේ නැහැ. ඒ නිසා මේ ටියුෂන් මඟින් පමණයි උගන්වන්නේ කියන කතාව පිළිගන්න බැහැ.
හතළිස් ලක්ෂයක් දරුවන්ගෙන් විභාගයට ඉදිරිපත් වෙන දරුවෝ කීදෙනෙක් ටියුෂන් ගිහින්ද කියලා හිතන කොට සංඛ්‍යාත්මකව එය සම්පූර්ණ නැහැ. දියුණු වන ලෝකයක අපේ රටත් දියුණු වෙන්නට ඕනෑ. දියුණුවට මුහුණ දෙන පරම්පරාවක් බිහි කරන්නට ඕනෑ. ඒ පරම්පරාව දිනන ජයග්‍රාහී පරම්පරාවක් කිරීමට තමයි මේ පාසල් එකිනෙක ගොඩනැඟෙන්නේ. අලුත් දේ නිෂ්පාදනය කරන්නට, අලුත් දේට යොමුවන පරම්පරාවක් පාසල් ජීවිතය තුළම ඇති කරගැනීමේ ඕනෑකම ට අපි කැපවෙමු. අනිත් හැම දරුවකුටම පාසල් ජීවිතයෙන් පසු අතිරේක නව තාක්ෂණික දැනුම තැන්පත් කිරීමේ වැඩ පිළිවෙළක් රට පුරාම දියත් කිරීමට ආණ්ඩුව තීරණය කරලා ජනාධිපතිතුමා ප්‍රකාශයට පත් කරලා තිබෙනවා. සෑම පාසලකින්ම පිටවෙන දරුවෙක්ට ඒ අනාගත විශ්වාසය ලබාදීම සඳහා ආණ්ඩුව ප්‍රතිපාදන හා ප්‍රතිපත්තිමය ආයතන බිහි කරලා ආරම්භ කරලා තියෙනවා.
බස්නාහිර පළාත් ආණ්ඩුකාර රොෂාන් ගුණතිලක මහතා –
නගරයෙන් පිට මෙවැනි පාසල්වලට උදව් කිරීම ඉතා වැදගත්. මේ පාසලෙන් විශ්වවිද්‍යාලයට ළමයි තේරීම ඒකට හොඳම උදාහරණයක්. පළාත් සභාවේ මුදල් නිසි විදිහට භාවිත කර මෙවැනි කර්තව්‍යයන් සිදුවීම ගැන මම සතුටු වෙනවා. ළමයි එක්දහස්හත්සිය ගණනක් සිටින පාසලක ළමයින්ට විශ්වවිද්‍යාලය දක්වා පිවිසීමට සහාය වීම අපේ යුතුකමක්. පාසල්වල අඩුපාඩු සොයා බලලා ඒවා සම්පූර්ණ කිරීම අපේ වගකීමක්. මේ ක්‍රීඩාගාරය වායු සමීකරණය කරන්න අපි පියවර ගන්නවා. මේ පළාතේ තිබෙන පාසල් සම්බන්ධයෙන් මෙන්ම අනෙකුත් ගැටලු සම්බන්ධයෙන් ද අගමැති ඒ සම්බන්ධයෙන් අපව නිතර දැනුම්වත් කරනවා.
රාජ්‍ය පරිපාලන අමාත්‍යාංශ ලේකම් ප්‍රදීප් යසරත්න, බස්නාහිර පළාත් අධ්‍යාපන අමාත්‍යාංශ ලේකම් ඒ.ඩී.එස්. සදීකා මහත්ම මහත්මීන්, ගුරුවරුන්, මවුපියන්, දරුවන් ඇතුළු ප්‍රදේශවාසීන් මෙම අවස්ථාවට සහභාගී වූහ.
