හොර පාරෙන් ගෙනා බීඩි කොළ කිලෝ 2583ක් අධිශිතකරණ ලොරියේ
Monday, 15 January 2024 - 11:03 am
විදේශයකින් නීති විරෝධි ලෙස ගෙන්වන ලද බීඩි කොළ කිලෝ 2583ක් ලොරි රථයකින් ප්‍රවාහනය කරමින් තිබියදී සුරාබදු නිලධාරීන් දෙදෙනකු ඇතුළු සැකකරුවන් තිදෙනෙකු සමඟ 14දා අලුයම මිල්ලගොඩදී අත්අඩංගුවට ගත් බව නිකවැරටිය මූලස්ථාන පොලීසිය පවසයි. අධිශීතකරණ ලොරි රථයක ප්‍රවාහනය කරමින් තිබූ උර 85 කින් යුතු මෙම බීඩි කොළ තොගය නිකවැරටිය කුරුණෑගල ප්‍රධාන මාර්ගයේ දී මෙසේ අත්අඩංගුවට ගෙන ඇත. මුහුදු මාර්ගයෙන් ගෙන්වන ලද මෙම නීති විරෝධී බීඩි කොළ තොගය නොරොච්චෝල, දලුව, කලපුව ප්‍රදේශයේ සිට ප්‍රවාහනය කරමින් සිටි බවට හා සැකකරුවන් පුත්තලම, නුවර, ගොකරැල්ල පදිංචි අයවලුන් බවට පරීක්ෂණවලදී අනාවරණය වී ඇත.
වයඹ පළාත බාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත් මහතාගේ උපදෙස් අනුව, කුරුණෑගල දිසාව බාර ජ්‍යෙෂ්ඨ නියෝජ්‍ය පොලිස්පති සුජිත් වෙද මුල්ල මහතාගේ අධීක්ෂණයෙන්, නිකවැරටිය කොට්ඨාශ බාර ජ්‍යෙෂ්ඨ පොලිස් අධිකාරි ජී. ජේ. නන්දන මහතාගේ සහ ජ්‍යෙෂ්ඨ පොලිස් අධිකාරි වීරසිංහ මහතාගේ මෙහෙයවීමෙන්, මූලස්ථාන ප්‍රධාන පොලිස් පරීක්ෂක තිලක් සුබසිංහ මහතාගේ මූලිකත්වයෙන් වැටලීම සිදු කෙරිණි.
සිද්ධිය සම්බන්ධයෙන් නිකවැරටිය මූලස්ථාන පොලීසිය වැඩිදුරටත් පරීක්ෂණ සිදු කරයි.
.webp)
