Local

මධ්‍යම අධිවේගයේ කඩවත - මීරිගම කොටසේ ඉදිකිරීම් ඉදිරි මාස 02 තුළ යළි ඇරඹේ

Thursday, 13 February 2025 - 1:06 pm

මේ වන විට ඉදිකිරීම් නතර කර ඇති මධ්‍යම අධිවේගී මාර්ගයේ පළමු අදියරේ ඉදිකිරීම් ඉදිරි මාස දෙක තුළ ආරම්භ කරන බව ප්‍රවාහන හා මහාමාර්ග නියෝජ්‍ය අමාත්‍ය ප්‍රසන්න ගුණසේන පවසනවා.

ඒ අනුව ඊට අදාළ ණය වාරිකය සඳහා චීන එක්සිම් බැංකුවේ අනුමැතිය අපේක්ෂාවෙන් සිටින බවයි නියෝජ්‍ය අමාත්‍යවරයා සඳහන් කළේ.

මධ්‍යම අධිවේගී මාර්ගයේ පළමු අදියර වන කඩවත සිට මීරිගම දක්වා කොටසේ දිග කිලෝමීටර 37 ක් වන අතර, එහි ඉදිකිරීම් වලින් 20%ක් ඉක්මවා මේ වනවිට අවසන් කර තිබෙනවා.

ජනාධිපති අනුර කුමාර දිසානායකගේ චීන නිල සංචාරය අතරතුර පැවති සාකච්ඡාවල ප්‍රතිඵලයක් ලෙස එහි ඉදිකිරීම් යළි ආරම්භ කෙරෙන බවයි නියෝජ්‍ය අමාත්‍යවරයා වැඩිදුරටත් ප්‍රකාශ කළේ.