Local

තලතාගේ පුටුව කරු පරණවිතානට

Thursday, 22 August 2024 - 9:38 am

සමගි ජන බලවේගයේ රත්නපුර දිස්ත්‍රිත් පාර්ලිමේන්තු මන්ත්‍රිනි තලතා අතුකෝරල මහත්මිය සිය මන්ත්‍රී ධුරයෙන් ඊයේ (21) ඉල්ලා අස්වීමත් සමඟ පුරප්පාඩු වූ මන්ත්‍රී ධුරය සඳහා තේරී පත්වීමට නියමිතව ඇත්තේ හිටපු පාර්ලිමේන්තු මන්ත්‍රීවරයකු වන කරුණාරත්න පරණවිතාන මහතායි.

සමගි ජන බලවේගයෙන් ඔහු 2020 පාර්ලිමේන්තු මැතිවරණය සඳහා රත්නපුර දිස්ත්‍රික්කයෙන් තරග කර එම පක්ෂයේ මනාප ලැයිස්තුවේ 04 වැනි ස්ථානය ලබාගෙන තිබුණේ ඡන්ද 36,787ක් ගනිමිනි. රත්නපුර දිස්ත්‍රික්කය නියෝජනය කරමින් 2020 වසරේ මන්ත්‍රීවරුන් තිදෙනකු තේරි පත් වූ අතර වැඩිම ඡන්ද ප්‍රතිශතයක් ලබා ගනිමින් පාර්ලිමේන්තු මන්ත්‍රී හේෂා විතානගේ, වරුණ ලියනගේ සහ තලතා අතුකෝරල යන මහත්ම මහත්මීහු තේරී පත්වූහ. 2015 වසරේ පාර්ලිමේන්තු මැතිවරණය සඳහා රත්නපුර දිස්ත්‍රික්කයෙන් තරග කර කරුණාරත්න පරණ විතාන මහතා පස් වන ස්ථානය හිමිකරගෙන පාර්ලිමේන්තුව සඳහා තේරී පත් විය.

ඒ මහතා ජනමාධ්‍ය නියෝජ්‍ය, වෘත්තිය පුහුණු සහ නිපුණතා සංවර්ධන අමාත්‍ය ධුර දරනු ලැබීය.

කරුණාරත්න පරණවිතාන මහතා මේ වන විට පාඨලී චම්පික රණවක මහතාගේ නායකත්වයෙන් යුතු එක්සත් ජනරජ පෙරමුණ නියෝජනය කරයි.