Local

මාර්ග දෙපස එක්රැස්ව සිටින වන සතුන්ට ආහාර දීමෙන් වළකින්න - වනජීවී අධ්‍යක්ෂ

Tuesday, 18 March 2025 - 2:24 pm

මාර්ගවල සිටින වන සතුන්ට ආහාර දීමෙන් වළකින ලෙස වනජීවී සංරක්ෂණ දෙපාර්තමේන්තුවේ අධ්‍යක්ෂ මංජුල අමරරත්න ජනතාවගෙන් ඉල්ලා සිටිනවා.

වන සත්ව හා වෘක්ෂලතා ආරක්ෂක ආඥා පනත යටතේද වන සතුන්ට ආහාර ලබාදීම නීති විරෝධී ක්‍රියාවක් බවයි මාධ්‍ය හමුවකට එක්වෙමින් ඔහු සඳහන් කළේ.

මීට අවුරුදු කිහිපයකට පෙර කතරගම - බුත්තල මාර්ගයේ අලි ඇතුන් සිටියේ කිහිප දෙනෙකු බවත්, පසුව වන්දනාවේ ගොස් පැමිණෙන පිරිස් ඔවුන්ට ආහාර ලබාදීමට පුරුදු වූ බවත්, ඒ නිසා මේ වනවිට එයට හුරු වූ අලි ඇතුන් මංකොල්ලකරුවන් ලෙස ආහාර නොදී යාමට ඉඩ ලබා නොදෙන තත්ත්වයක් මතුව ඇති බවත් ඔහු සඳහන් කළා.

අද එම සතුන් මාර්ගයේ ගමන් කරන ජනතාවට කරදරයක් බවට පත්ව ඇති බවයි වනජීවී සංරක්ෂණ දෙපාර්තමේන්තුවේ අධ්‍යක්ෂ මංජුල අමරරත්න වැඩිදුරටත් සඳහන් කළේ.