සියලුම රජයේ ගෙවීම් ඩිජිටල්කරණය ආරම්භ කරමින් GovPay සේවාව මීට සුළු මොහොතකට පෙර ජනාධිපති අනුර කුමාර දිසානායකගේ ප්‍රධානත්වයෙන් දියත් කරනු ලැබුවා.
මුදල් නෝට්ටු මත පදනම් වූ ගෙවීම් වංචා සහ දූෂණ වැඩිවීමට මෙන්ම මුදල් ගෙවීමේ ක්‍රියාවලිය අකාර්යක්ෂම වීමට හේතු වී ඇති බවද, ඒ වෙනුවට ඩිජිටල් ගෙවීම් භාවිතා කිරීම මගින් මහජනතාවට වඩා පහසු සහ විශ්වාසනීය සේවාවක් සැලසීමට හැකිවනු ඇති බවයි ජනාධිපතිවරයා පෙන්වා දුන්නේ.
GovPay සේවාව අද සිට අන්තර්ජාල සහ ජංගම දුරකථන බැංකු සේවා හරහා මෙන්ම, හෙළPay සහ iPay වැනි ශ්‍රී ලංකා මහ බැංකුවේ අනුමැතිය සහිත Payment Apps හරහා ද මහජනතාවට විවෘත වෙනවා.
දැනට රාජ්‍ය ආයතන 16ක් සඳහා මේ හරහා ගෙවීම් සිදුකළ හැකි අතර, අප්‍රේල් මාසය වන විට ආයතන 30ක් ඊට එක්වීමට නියමිත බවයි සඳහන් වන්නේ.
ඩිජිටල්කරණය යනු රට අලුත් තලයකට ඔසවා තබන වැදගත් පියවරක් බවයි මෙම අවස්ථාවට එක්වෙමින් ජනාධිපතිවරයා වැඩිදුරටත් අවධාරණය කළේ.
