ඉමියුනොග්ලොබියුලින් එන්නත් වංචාව කෙහෙළියගේ ඇප අයදුම්පත ගැන 22 දා කරුණු දක්වන්න නියෝග
Saturday, 16 March 2024 - 8:19 am
ප්‍රමිතියෙන් තොර ප්‍රතිදේහ එන්නත් මෙරටට ආනයනය කර රජයේ රෝහල්වලට බෙදා හැරීමෙන් රුපියල් කෝටි ගණනක වංචාවක් සිදු කිරීම හා රෝගී ජීවිත අනාරක්ෂිත තත්ත්වයට පත් කිරීමේ සිද්ධියට අදාළව රක්ෂිත බන්ධනාගාරගත කර සිටින හිටපු සෞඛ්‍ය ඇමැති කෙහෙළිය රඹුක්වැල්ලගේ ඇප අයදුම්පත සම්බන්ධයෙන් ලබන 22 දා කරුණු දක්වන ලෙස කොළඹ මහාධිකරණය නියම කළේය.
හිටපු සෞඛ්‍ය ඇමැති කෙහෙළිය රඹුක්වැල්ල ඇප මත මුදාහරින ලෙස ජනාධිපති නීතිඥ අනුජ ප්‍රේමරත්න කළ ඉල්ලීමක් සලකා බලමින් කොළඹ මහාධිකරණ විනිසුරු සුජීව නිශ්ශංක මෙම නියෝගය දුන්නේය.
ඉන්දියානු ණය යෝජනා ක්‍රමය යටතේ ව්‍යාජ ලේඛන ඉදිරිපත්කර ප්‍රමිතියෙන් තොර ඉමියුනෝග්ලොබියුලින් නමැති ප්‍රතිදේහ එන්නත් ආනයනය කළ බවට හා ඒවා රජයේ රෝහල්වලට බෙදාහැරීමෙන් රෝගී ජීවිත අනතුරේ හෙළීම, රජයට වංචා කිරීම යන චෝදනාව යටතේ හිටපු ඇමැති කෙහෙළිය ඇතුළු 7දෙනකු රහස් පොලිසිය විසින් විමර්ශන සඳහා සැකපිට අත්අඩංගුවට ගන්නා ලදී.
රක්ෂිත බන්ධනාගාරගත කර සිටින එම සැකකරුවන්ට ඕනෑම කොන්දේසියක් යටතේ ඇප දෙන ලෙස කරන ලද ඉල්ලීමක් විභාග කළ මාලිගාකන්ද මහේස්ත්‍රාත් ලෝචනී අබේවික්‍රම (14) නඩු විභාගය නිමවනතෙක් විත්තිකරුවන් රිමාන්ඩ් බන්ධනාගාරගත කරන ලෙස නියම කළාය.
ඇප නියෝගය ප්‍රකාශයට පත් කරමින් මහේස්ත්‍රාත්වරිය සඳහන් කළේ පොදු දේපළ පනතේ සැකකරුවකු අධිකරණයට ඉදිරිපත් කර රක්ෂිත බන්ධනාගාර ගත කළ විටඇපමත මුදා හැරීම සඳහා සුවිශේෂි කරුණු ඉදිරිපත් කිරීම අත්‍යවශ්‍ය බවය.
කෙහෙළිය රඹුක්වැල්ලට විරුද්ධව මෙම නඩුවට අමතරව 2015 ජනාධිපතිවරණය පැවැති සමයේ දේශපාලන ක්‍රියාකාරකම් සඳහා ශ්‍රී ලංකා රූපවාහිනී සංස්ථාවට අයත් රු. 9,90,000ක මුදලක් වැය කර ජීඅයි පයිප්ප බට මිල දී ගැනීමෙන් රජයට පාඩු සිදුකිරීමේ වරදට සහ ජනමාධ්‍ය ඇමැතිවරයා වශයෙන් කටයුතු කරමින් සිටියදී සිය පෞද්ගලික ජංගම දුරකතන බිල රාජ්‍ය මුද්‍රණ නීතිගත සංස්ථාවේ මුදල්වලින් ගෙවීමෙන් රජයට පාඩුවක් සිදු කිරීමේ චෝදනාව යතේ තවත් නඩු දෙකක්ද කොළඹ මහාධිකරණය ඉදිරියේ විභාග වේ. ඒවාට ඔහුට ඇප හිමිව ඇත.
