Local

පේරාදෙණිය කෘෂිකර්ම කථිකාචාර්ය ඖෂධ අධි මාත්‍රාවක් ගෙන මරුට

Tuesday, 23 January 2024 - 5:19 am

මියගිය ආචාර්ය බී.එල් පීරිස් මහතා

ඖෂධ අධි මාත්‍රාවක් පානය කිරීම නිසා අසාධ්‍ය තත්ත්වයෙන් පේරාදෙණිය ශික්ෂණ රෝහලට ඇතුළත් කළ පේරාදෙණිය විශ්වවිද්‍යාලයේ කෘෂිකර්ම පීඨයේ ආචාර්යවරයෙකු ඊයේ (22) මියගොස් ඇත.

කෘෂිකර්ම පීඨයට අයත් නිල නි‍වෙසක බිරිඳ සමඟ පදිංචිව සිට ඇති ආචාර්යවරයා ඊයේ (22) අලුයම 1.00ට පමණ අසාධ්‍ය තත්ත්වයෙන් රෝහල් ගතකර තිබේ. මියගොස් ඇත්තේ කෘෂිකර්ම පීඨයේ භෝග විද්‍යා අංශයේ ජ්‍යෙෂ්ඨ කථිකාචාර්යවරයෙකු ලෙස සේවය කළ ආචාර්ය බී.එල්. පීරිස් (60) නැමැති අය බව පේරාදෙණිය විශ්වවිද්‍යාලයේ මාධ්‍ය ප්‍රකාශක, නියෝජ්‍ය උපකුලපති මහාචාර්ය ටෙරන්ස් මදුජිත් මහතා කීය.

මහාචාර්යවරයාගේ බිරිඳ පේරාදෙණිය විශ්වවිද්‍යාලයේ ප්‍රධාන පුස්තකාලයේ සේවය කරන අතර මරණය සම්බන්ධයෙන් පේරාදෙණිය පොලිසිය පරීක්ෂණ පවත්වයි.

මරණයට හේතුව සම්බන්ධයෙන් ස්ථිර ප්‍රකාශයක් කළ හැකි වන්නේ පශ්චාත් මරණ පරීක්ෂණය සිදු කිරීමෙන් පසුව බව පොලිසිය පවසයි.