Local

බිත්තරයක් රුපියල් 60-65 දක්වා මිල වැඩිවෙනවා..- බිත්තර සභාපති

Wednesday, 13 November 2024 - 1:35 pm

කුකුළු ආහාර නිෂ්පාදන මිල ඉහළ යාම හේතුවෙන් බිත්තරයක් රුපියල් 60-65ත් අතර මිලකට ඉහළ යන තත්ත්වයක් උදාවී ඇති බව සමස්ත ලංකා බිත්තර නිෂ්පාදකයන්ගේ සංගමය සඳහන් කරයි.

සහල් මෝල් හිමියන් සහල් පොලිෂ් මිල හා සුණු සහල් මිල තුන් ගුණයකින් වැඩි කිරීම මෙම තත්ත්වයට දැඩිව බලපා ඇති බවද සංගමයේ සභාපති සරත් රත්නායක මහතා කියා සිටී.

ඇතිවී තිබෙන තත්ත්වය මත මෙතෙක් රුපියල් 150කට නිෂ්පාදනය කරගත් කුකුල් කෑම කිලෝවක් මේ වන විට රුපියල් 200 සීමාවට පැමිණ ඇති බවද ඔහු පෙන්වා දෙයි.

අද වන විට බිත්තරයක නිෂ්පාදන වියදම රුපියල් 38ක් පමණ වුවත් රුපියල් හතක පමණ පාඩුවක් දරමින් බිත්තරයක් රුපියල් 30-31 අතර තොග මිලකට වෙළඳපලට නිකුත් කරමින් ඇති බවද හෙතෙම පෙන්වා දෙයි.

මෙම තත්ත්වය මත කුඩා හා මධ්‍ය පරිමාණ ගොවීන් කුකුළු බිත්තර නිෂ්පාදනය අත හරිමින් ඇති බවත් එවන් තත්ත්වයකදී බිත්තර මිල රුපියල් 60 සීමාව ඉක්මවනු ඇති බවත් හෙතෙම තවදුරටත් කියා සිටියේය.