හොරාගේ අම්මගෙන් පේන අහන්නේ නැතිව බහලුම් ගැන සත්‍ය තොරතුරු අනාවරණය කරන්න
Tuesday, 10 June 2025 - 8:47 am
හොරාගේ අම්මගෙන් පේන අහන්නේ නැතිව පරීක්ෂා නොකර නිදහස් කළ බහලුම් ගැන සත්‍ය තොරතුරු අනාවරණය කරන්න යැයි විපක්ෂ නායක සජිත් ප්‍රේමදාස මහතා පැවසීය.
ඒ මහතා තවදුරටත් ඊයේ (09) මෙසේද පැවසීය.
පසුගිය ජනවාරි මාසයේ රේගුව රතු අවදානම් සහිත බහලුම් 323ක් කිසිදු පරීක්ෂාවකින් තොරව නිදහස් කිරිම ගැන බරපතළ ආන්දෝලනාත්මක තත්ත්වයක් ඇතිව තිබෙනවා. මෙම චෝදනාව මුලින්ම ගෙන ආවේ දේශපාලනඥයන් නොව රේගු වෘත්තීය සමිති සන්ධානයයි. රේගු මාණ්ඩලික නිලධාරීන්ගේ සංගමය ජ්‍යෙෂ්ඨ රේගු අධිකාරීවරුවන් ඇතුළු රේගුව නියෝජනය කරන බහුතර කණ්ඩායම් මෙම චෝදනාව ඉදිරිපත් කළා. කඩිමුඩියේ දින කිහිපයක් තුළ අධි අවදානම් බහලුම් නිදහස් කළා. එහිදී නිසි ක්‍රමවේදය අනුගමනය කර නැහැ.
මෙම බහලුම් නිදහස් කිරීම තුළ රටට ලැබිය යුතු ආදයම් අහිමි වීම, තහනම් භාණ්ඩ මුදා හැරීම මෙන්ම කෘත්‍රිම ගැටලුවක් ඇතිව තිබෙනවා. මීට පෙර දණ්ඩනයට ලක්වූ කණ්ඩායම්වල බහලුම් ද ඇති බවත් මේ ගැන ආණ්ඩුවේ ප්‍රතිචාර නැහැ. කමිටු පත්කර පර්යේෂණ කරනවා කිවුවත් තවමත් කිසිවක් සිදු වුණේ නැහැ. මෙම පරීක්ෂණයේ විනිවිදභාවය ගැන ගැටලු ඇති. මේ ගැටලුව ගැන ආණ්ඩුවේ වගවීම සහ වගකීම සිදු කළ යුතු වුවත් ජනාධිපතිවරයා සහ ආණ්ඩුව වගකීමෙන් හා වගවීමෙන් තොරව කටයුතු කර තිබෙනවා.
මේ බහලුම්වලට සම්බන්ධ ව්‍යාපාරිකයන් දුන් තොරතුරු ගැන විශ්වාසයි. රේගුවෙන් 60%ක් පමණ පරීක්ෂා නොකරන බව පවසනවා. මේ බහලුම් නිෂ්කාශනයේ බරපතළ ගැටලු රැසක් තිබෙනවා. මෙය හොරකම නැති කරන්න නොව හොරකම බිහිකරනවා.
බහලුම් පරීක්ෂා කරන උපකරණවලට කෝටි ගණන් වියදම් කර අද 60%ක් බහලුම් පරීක්ෂා නොකරන බවත් මේ බහලුම්වල අන්තරාදායක දේවල් නොමැති බවට පරීක්ෂා නොකර කියන්නේ කෙසේද කියා ගැටලුවක් තිබෙනවා. මෙය දැඩි කතාබහට ලක්ව තිබෙනවා. සමහරු කියන ආකාරයට මෙහි යුද ආම්පන්න හා මත්ද්‍රව්‍ය ඇති බවත් පැවසෙනවා. මෙවැනි තත්ත්වයක් තුළ පැහැදිලිවම ජාතික ආරක්ෂාවට බරපතළ ගැටලුවක් ඇතිව තිබෙනවා.
රක්ෂණ ශ්‍රියන්ත
.webp)
