එකඟතා කඩ කළ මොහොතේදීම IMF සහාය මෙරටට අහිමි වෙනවා
Saturday, 31 August 2024 - 8:33 am
විපක්ෂයේ අපේක්ෂකයන් ලබාදෙන පොරොන්දු ක්‍රියාත්මක වුවහොත් ඒ මොහොතේදීම ජාත්‍යන්තර මූල්‍ය අරමුදලේ වැඩසටහන මෙරටට අහිමි වන බව මුදල් රාජ්‍ය ඇමැති ශෙහාන් සේමසිංහ මහතා අවධාරණය කරයි.
මුදල් රාජ්‍ය ඇමැති ශෙහාන් සේමසිංහ මහතා මේ බව සඳහන් කළේ කොළඹ මල්පාරේ පිහිටි ජනාධිපති රනිල් වික්‍රමසිංහ මහතාගේ දේශපාලන කාර්යාලයේ දී පැවති මාධ්‍ය හමුවේදීය.
මෙහිදී වැඩිදුරටත් අදහස් දක්වමින් මුදල් රාජ්‍ය ඇමැති ශෙහාන් සේමසිංහ මහතා මෙසේද පැවසීය. ඒ සමඟ මෙරට විදෙස් ණය හිමියන් සහ පෞද්ගලික බැඳුම්කර හිමියන් සමඟ ඇතිකර ගෙන තිබෙන එකඟතා ද අහිමිව රට බරපතළ අර්බුදයකට ගමන් කිරීමේ අවදානමක් තිබෙනවා.
උපයන විට ගෙවන බද්ද සංශෝධනය කරමින් ජනතාවට සහන සැලසීම පිළිබඳව මේ වන විට ජාත්‍යන්තර මූල්‍ය අරමුදල සමඟ සාකච්ඡා කරමින් සිටිනවා. ඊට අදාළ අවසන් එකඟතා ඇති කර ගැනීමෙන් අනතුරුව 2025 අප්‍රේල් මාසය වන විට බදු අඩු කිරීම් ක්‍රියාත්මක කිරීමට හැකි වෙනවා.
ජනාධිපති රනිල් වික්‍රමසිංහ මහතාගේ ජනාධිපතිවරණ ප්‍රතිපත්ති ප්‍රකාශය වන “පස් වසරක මෙහෙයුම – පුළුවන් ශ්‍රී ලංකා” අද එළිදක්වනු ලැබුවා. ආර්ථික අර්බුදය හමුවේ අගාධයට වැටී තිබූ රට ජීවත් වීමට හැකි රටක් බවට පරිවර්තනය කළේ ජනාධිපති රනිල් වික්‍රමසිංහ මහතායි. වෙන කිසිවකු එම අභියෝගය භාර ගන්න උනන්දුවක් දැක්වූයේ නැහැ. ඒ වගේම එම අභියෝගය භාර ගන්න ඔවුන්ට හැකියාවක් තිබුණේ ද නැහැ. “පස් වසරක මෙහෙයුම – පුළුවන් ශ්‍රී ලංකා” ප්‍රතිපත්ති ප්‍රකාශය පදනම් වන්නේ අපි ගොඩනඟාගත් ආර්ථික ස්ථාවරත්වය ඉදිරියට ගෙන යාම සඳහායි. මෙම වැඩසටහන තවදුරටත් ඉදිරියට ගෙන යමින් ලැබෙන ප්‍රතිලාභ තවදුරටත් වැඩි කර ගන්නවා ද නැද්ද යන්න සැප්තැම්බර් 21 වැනිදා ජනතාව තීන්දු කළ යුතුයි.
මේ අවස්ථාවේ දී මෙරට වැදගත්ම කාරණය වන්නේ ආර්ථිකයයි. බොහෝ පාර්ශ්ව ආර්ථිකය සම්බන්ධව විවිධ යෝජනා ඉදිරිපත් කළත් එම යෝජනා ක්‍රියාත්මක කිරීමට ඇති හැකියාව පිළිබඳව අවබෝධයක් නොමැති බව පෙනී යනවා. කඩාවැටුණු මෙරට ආර්ථිකය වසර දෙකක් තුළ ගොඩනැඟීමට ජනාධිපති රනිල් වික්‍රමසිංහ මහතා ඇතුළු අප බොහෝ දෙනෙක් කැපවීමෙන් කටයුතු කළා. ඒ අවස්ථාවේ අපගේ වැඩපිළිවෙළ කඩාකප්පල් කිරීමට සහ අපි අසාර්ථක වනු ඇතැයි සිතා හිනා වූ අය අද ජනතාව ඉදිරියට පැමිණි පොරොන්දු දෙන ආකාරය සාදාචාරාත්මක ද කියා ඇසිය යුතුයි.
මේ වන විට අප ලබාගත් ආර්ථික ස්ථාවරත්වයේ ප්‍රතිලාභ ජනතාවට ක්‍රමවත්ව ලබාදෙමින් තිබෙනවා. ජනාධිපතිතුමා නිරන්තරයෙන් පැවසූ කරුණක් වූයේ රට ආර්ථිකමය වශයෙන් ශක්තිමත් වන විට ඉන් එක් කොටසක් රටේ ආර්ථිකය ශක්තිමත් කරවීමට යෙදවිය යුතු බවත් අනෙක් කොටස ප්‍රතිසංස්කරණ වැඩසටහන හමුවේ ඇතිවූ බලපෑම අවම කිරීමට ජනතාව වෙත ලබා දිය යුතු බවයි. ඒ අනුව ජනාධිපතිතුමා, රාජ්‍ය සේවක වැටුප් වැඩි කර විෂමතා ඉවත් කිරීම සඳහා කමිටුවක් පත් කළා. එම කමිටු වාර්තාව මත රාජ්‍ය සේවයේ අවම වැටුප රුපියල් 55000ක් වන ආකාරයට ඉහළ දැමීම සිදු වෙනවා. එය ලබන වසරේ සිට ලබාදීමට හැකි වෙනවා” යැයි පැවසීය.
.webp)
