යාපනයේ චණ්ඩි පහක් දැලේ
Saturday, 16 March 2024 - 8:26 am
යාපනය ගුරුනගර් ප්‍රදේශයේ නිවසකට පහර දී ත්‍රිරෝද රථයකින් පලායමින් සිටි පුද්ගලයන් 05 දෙනකු තියුණු ආයුධ සමග පොලිස් විශේෂ කාර්ය බළකායේ නිලධාරීන් පිරිසක් විසින් (14) අත්අඩංගුවට ගෙන තිබේ.
පොලිස් විශේෂ කාර්ය බළකායේ නිලධාරීන් පිරිසකට ලද තොරතුරක් මත යාපනය පොලිස් වසමේ යාපනය පොලිස් ස්ථානය අසල දී වැටලීම කර ඇත.
යාපනයයේ පදිංචි පුද්ගලයන් පස් දෙනා සමඟ කඩු 01ක් සහ යකඩ පොලු 02ක් අත්අඩංගුවට ගෙන තිබේ. සැකකරුවන් වැඩිදුර විමර්ශන කටයුතු සඳහා යාපනය පොලිස් ස්ථානය වෙත භාර දී ඇති බව පොලිස් විශේෂ කාර්ය බලකාය පවසයි.
පොලිස් විශේෂ කාර්ය බලකාය යාපනය කඳවුරේ නිලධාරීන්ට ලද තොරතුරකට අනුව විශේෂ කාර්ය යාපනය කලාපය භාර ජ්‍යෙෂ්ඨ පොලිස් අධිකාරී රෝයි සුමනවර්ධනගේ මෙහෙයවීම මත, සහකාර පොලිස් අධිකාරී පෙරේරා මහතාගේ අධීක්ෂණයෙන් යාපනය කඳවුරේ උප පොලිස් පරීක්ෂක එච්.ඩී.කේ. විතාරණ ඇතුළු නිලධාරීන් කණ්ඩායමක් විසින් මෙම වැටලීම සිදුකර තිබේ.
