Local

පසුගිය වසර 10 තුළ දුම්වැටි අලෙවිය 50% කින් අඩුවෙලා, ලාභය 500% කින් වැඩිවෙලා - මත්ද්‍රව්‍ය තොරතුරු මධ්‍යස්ථානය

Friday, 24 January 2025 - 9:34 pm

පසුගිය වසර 10 ක කාලය තුළ මෙරට දුම්වැටි අලෙවිය 50% කින් අඩුවී ඇති බව මධ්‍යසාර සහ මත්ද්‍රව්‍ය තොරතුරු මධ්‍යස්ථානය පවසනවා.

ඒ අනුව වසර 10 කට පෙර වසරකට දුම්වැටි මිලියන 4,800 ක් පමණ අලෙවි වුවද, මේ වනවිට වසරකට දුම්වැටි අලෙවි වන්නේ මිලියන 2,200 ක් පමණ ප්‍රමාණයක් පමණක් බවයි එහි විධායක අධ්‍යක්ෂ සම්පත් ද සේරම් සඳහන් කළේ.

නමුත් දුම්කොළ සමාගමට වාසි ආකාරයෙන් බදු ප්‍රතිපත්තිය තීරණය වීම නිසා දුම්කොළ සමාගම්වල ලාභය 400% - 500% ක ප්‍රමාණයකින් වැඩිවී ඇති බවද ඔහු ප්‍රකාශ කළා.

එමෙන්​ම පසුගිය වසර 5, 6 ඇතුළත නිවැරදිව බදු තීරණය නොකිරීම තුළින් රුපියල් බිලියන 100 ක් පමණ අහිමි වූ බවද ඔහු සඳහන් කළා.

මේ අතර සමස්ත බදු ආදායමෙන් දුම්වැටි බද්ද 6% ක් හා මධ්‍යසාර බද්ද 9% ක් පමණක් වන බවත්, එම බදු උපයෝගී කර ගනිමින් රාජ්‍ය සේවකයන්ගේ වැටුප් ගෙවන බවට මතයක් තිබුණද එය අසත්‍යක් බවයි සම්පත් ද සේරම් වැඩිදුරටත් ප්‍රකාශ කළේ.