Local

ලෝක ආදිවාසී දිනය අද

Friday, 09 August 2024 - 8:55 am

ලෝක ආදිවාසී දිනය අදට (09) යෙදී තිබේ.

සෑම වසරකම අගෝස්තු මස 9 වනදා ලෝක ආදිවාසී ජනතාවගේ ජාත්‍යන්තර දිනය සමරනු ලබන්නේ ලෝක ආදිවාසී ජනගහණයේ අයිතිවාසිකම් නැංවීම හා සුරැකීම සඳහාය.

මෙවර එහි තේමාව වී ඇත්තේ ආදිවාසී සංස්කෘතියේ වෙනස්කම් පිළිබඳව තීරණ ගැනීමට ආදිවාසී තරුණ තරුණියන් නියෝජිතයන් ලෙස හඳුනාගැනීම යන්නය.

මෙරට ආදිවාසී ජනයාද දඹාන කොටබකිණිය අදිවාසී ගම්මානය කේන්ද්‍ර කරගනිමින් අද මෙම දිනය සමරනු ලබයි.

ඊට බුද්ධශාසන හා ආගමික කටයුතු අමාත්‍ය විදුර වික්‍රමනායක මහතා ද එක්විමට නියමිතය.

ආදිවාසී දිනය සැමරීම සම්බන්ධයෙන් අදහස් දක්වමින් ආදිවාසී නායක ඌරුවරිගයේ වන්නිලා ඇත්තන් පැවසුවේ රටපුරා සිටින ආදිවාසී ගම්මානවල නායකයින් එක්වී පැවැත්වූ වරිග සභාවේදී සාකච්ඡා කළ පරිදි තම ජනයාට ඇති ගැටළු නිරාකරණය කරගැනීම සඳහා වූ සංදේශයක් විෂයභාර අමාත්‍යවරයා වෙත අද දිනයේදී බාරදීමට නියමිත බවය.