අපි හොරු අල්ලන්නේ උසාවියෙන් ඇප නොලැබෙන ලෙසයි…
Tuesday, 29 October 2024 - 9:50 am
ජාතික ජන බලවේග ආණ්ඩුව නීතිය ක්‍රියාත්මක කරන්නේ දූෂිතයන්ට අධිකරණයෙන් ඇප ගැනීමට හැකි වන ආකාරයට නොවන බවත්, ඒ සඳහා මන්ත්‍රී ආසන 125කින් යුතු ශක්තිමත් ආණ්ඩුවක් දෙන ලෙස ජනතාවගෙන් ඉල්ලා සිටින බවත් ජාතික ජන බලවේගයේ අනුරාධපුර දිස්ත්‍රික් අපේක්ෂක, කණ්ඩායම් නායක වසන්ත සමරසිංහ මහතා පැවසීය.
මේ පිළිබඳව වැඩිදුරටත් අදහස් දැක්වූ ඒ මහතා මෙලෙස ද කීවේය.
“මල්වානේ බැසිල්ගෙ ඉඩම සහ යෝෂිත රාජපක්ෂගේ මැණික් මල්ල සම්බන්ධයෙන් සිදු කළ ප්‍රකාශ ලෙසම ජොන්ස්ටන්ගේ BMW මෝටර් රථය පිළිබඳවත් අධිකරණයේදී අසත්‍ය ප්‍රකාශ සිදු කළ හැකි නිසා ජාතික ජන බලවේගයේ ආණ්ඩුව නීතිය ක්‍රියාත්මක කරන්නේ එම දූෂිතයන්ට අධිකරණයේ ඇප දීමට නොවේ. ඇලෝසියස්ගෙන් මුදල් ගත් සියලුම දෙනා සජබ, පොහොට්ටුව සහ රනිල් ඇතුළු පක්ෂ තුනේම සිටිනවා. ඔවුන් සියලුම දෙනාට නීතිය ක්‍රියාත්මක කරනවා.
ජනාධිපතිවරණයේදී ජාතික ජන බලවේගයට කතිරේ ගැසීමෙන් පාර්ලිමේන්තුවේ අසූ දෙනකු පමණ ගෙදර යැවීම සිදු වුණා. රටට හා ජනතාවට පවතින ප්‍රශ්න විසඳීමට මෙවර පාර්ලිමේන්තුවට එකසිය විසි පහක ආසන සංඛ්‍යාවක් සහිත ජාතික ජන බලවේගයේ ආණ්ඩුවක් පත්කළ යුතුයි. ජාතික සම්පත් විකිණීම වෙනුවට රටේ ප්‍රශ්න නිර්මාණය කරන පක්ෂ මාරු කිරීමේ අවලංගු කිරීමේ පනත, ජනාධිපතිවරුන්ට විශ්‍රාම වැටුප් සහ වරදාන වරප්‍රසාද දෙන පනත් සංශෝධනය ඇතුළු පනත් රාශියක් ගෙන ඒමට ජාතික ජන බලවේගය ආණ්ඩුව කටයුතු කරනවා.”
