ඔන්ලයින් ඔස්සේ මුදල් වංචා කළ චීන්නු 86ක් අල්ලයි
Thursday, 01 August 2024 - 9:39 am
සංචාරක වීසාවලින් ලංකාවට ඇවිත්
අන්තර්ජාලය ඔස්සේ නීති විරෝධී මුදල් ගනුදෙනු කරමින් මහා පරිමාණ වංචාවල නිරත වූ චීන ජාතිකයන් 86 දෙනකු කළුතර සහ කල්පිටිය ප්‍රදේශවලදී පොලිසිය මඟින් ඊයේ (31දා) අත්අඩංගුවට ගෙන ඇත.
මෙම චීන ජාතිකයන් සංචාරක වීසා ලබාගෙන මෙරටට පැමිණ කාලයක සිට මෙම මහාපරිමාණ මූල්‍ය වංචාවල නිරතවෙමින් සිටින බව විමර්ශනවලින් හෙළි වී තිබේ.
මෙහිදී එක් වැටලීමක් කර ඇත්තේ කල්පිටිය ප්‍රදේශයේදීය. පුත්තලම කොට්ඨාස අපරාධ අංශයේ නිලධාරීන් විසින් කල්පිටිය ප්‍රදේශයේ හෝටලයක් වටලා කළ පරීක්ෂාවකදී එහි සිටි චීන කාන්තාවන් 9 දෙනකු ඇතුළු චීන ජාතිකයන් 56 දෙනකු අත්අඩංගුවට ගැනීමට හැකිවිය.
ඔවුන් සතුව තිබී රුපියල් කෝටියකට අධික මුදලක්, පරිගණක 44ක්, සිම්පත් 99ක් ඇතුළු තවත් උපකරණ රැසක් පොලිස් භාරයට ගෙන ඇත. අනෙක් වැටලීම කර ඇත්තේ කළුතර ප්‍රදේශයේදීය. කළුතර කොට්ඨාස අපරාධ ඒකකය මගින් නවාතැන්පළවල් දෙකක් වටලා කළ පරීක්ෂාවකදී චීන ජාතිකයන් 30 දෙනකු අත්අඩංගුවට ගෙන ඇත.
මොවුන් සතුව තිබී පරිගණක, ජංගම දුරකථන ඇතුළු තවත් උපකරණ රැසක් පොලිස් භාරයට ගෙන තිබේ.
මෙම චීන ජාතිකයන් දේශීය මෙන්ම විදේශිකයන් රවටමින් අන්තර්ජාලය ඔස්සේ මහාපරිමාණ මූල්‍ය වංචාවල නිරත වී ඇති බව විමර්ශනවලින් හෙළි වී ඇත.
හේමන්ත රන්දුණු
.webp)
