මැතිවරණ නීති සංශෝධනය සම්බන්ධයෙන් තවත් සාකච්ඡාවක් අද
Friday, 19 January 2024 - 1:13 pm
මැතිවරණ කොමිෂන් සභාවේ සාමාජිකයින් සහ මැතිවරණ නීති සංශෝධනය සඳහා නිර්දේශ ඉදිරිපත් කිරිමට පත්කළ ජනාධිපති පරීක්ෂණ කොමිෂන් සභාව අතර අද (19) තවත් සාකච්ඡාවක් පැවැත්වෙනවා.
මෙම සාකච්ඡාවේදී මැතිවරණ නීති සංශෝධනය සම්බන්ධයෙන් පවතින බාධා පිළිබඳව තවදුරටත් අදහස් හුවමාරු කර ගැනීමට නියමිත බවයි ජනාධිපති පරීක්ෂණ කොමිෂන් සභාවේ ලේකම් මාධව දේවසුරේන්ද්‍ර සඳහන් කළේ.
ඉලෙක්ට්‍රොනික ඡන්ද ක්‍රමය, තැපැල් ඡන්දය භාවිත කරන පාර්ශව වැඩි කිරීම සඳහා පවතින මූල්‍යමය හා ප්‍රායෝගික බාධා, ප්‍රජාතන්ත්‍රවාදී පාලන ක්‍රම පවතින ඉන්දියාව, කැනඩාව, බ්‍රිතාන්‍ය, දකුණු අප්‍රිකාව යන රටවල මැතිවරණ ක්‍රම අධ්‍යයනය යනාදිය පිළිබඳව සාකච්ඡාවේදී ප්‍රමුඛ අවධානයක් යොමු කරන බව සඳහන්.
මැතිවරණ නීති සංශෝධනය සම්බන්ධයෙන් ජනතාව හා සිවිල් සංවිධාන විසින් යෝජනා 50 කට අධික සංඛ්‍යාවක් මේ වනවිට ලැබී ඇති බවත්, ඒ සම්බන්ධයෙන් මේ වන විටත් අධ්‍යයනය කිරීම ආරම්භ කර ඇති බවත් ලේකම්වරයා වැඩිදුරටත් පවසා සිටියා.
