එක්ස්ප්‍රස් පර්ල් ගින්නට හේතුව නයිට්‍රික් අම්ල කාන්දුවක් බව නීතිපති අධිකරණයට දැනුම් දෙයි
Wednesday, 26 March 2025 - 9:49 pm
‘නයිට්‍රික් අම්ලය’ කාන්දු වීමෙන්, එක්ස්ප්‍රස් පර්ල් නෞකාව ගිනි ගැනීමට ලක්වී ඇති බව, විමර්ශනවලදී හෙළිව ඇති බව, නීතිපතිවරයා ශ්‍රේෂ්ඨාධිකරණ විනිසුරු මඬුල්ලට දැනුම් දී තිබෙනවා.
නෞකාව ගිනි ගැනීම සම්බන්ධයෙන් ගොනුකළ මූලික අයිතිවාසිකම් පෙත්සම් 04 ක් ශ්‍රේෂ්ඨාධිකරණය හමුවේ යළි කැඳවූ අවස්ථාවේදී මෙම දැනුම්දීම සිදුකර ඇති බවයි සඳහන් වෙන්නේ.
එම පෙත්සම් අගවිනිසුරු මූර්දු ප්‍රනාන්දු, යසන්ත කෝදාගොඩ, ශිරාන් ගුණරත්න, අචල වෙන්ගප්පුලි සහ ප්‍රියන්ත ප්‍රනාන්දු යන පංච පුද්ගල ශ්‍රේෂ්ඨාධිකරණ විනිසුරු මඩුල්ල හමුවේ විභාගයට ගෙන තිබෙනවා.
විමර්ශන වගදී හෙලිවූ පරිදි කන්ටේනර් දෙකකින් ‘නයිට්‍රික් අම්ලය’ කාන්දු වන බව දැනගෙන දින 09 ක කාලයක් ගතවී තිබුණත් ඒ සම්බන්ධයෙන් කිසිදු පියවරක් නොගත් එහි කාර්ය මණ්ඩලය සහ නෞකාව පාලනය කළ සමාගම මෙම නෞකාව ගිනිගැනීමට සම්පූර්ණයෙන්ම වගකිවයුතු බවයි අතිරේක සොලිසිටර් ජනරාල් නෙරීන් පුල්ලේ අධිකරණයට දැනුම් දී තිබෙන්නේ.
එම ව්‍යසනයට මෙරට රජය කිසිදු ආකාරයක වගකීමක් දැරීමේ අවශ්‍යතාවයක් නැති බවද අතිරේක සොලිසිටර් ජනරාල්වරයා විනිසුරු මඩුල්ල ඉදිරියේ වැඩිදුරටත් සඳහන් කර තිබෙනවා.
