Local

පොහොර වංචාවකට සම්බන්ධ සමාගම් 07 ක බැංකු වාර්තා කැඳවීමට නියෝග

Friday, 15 December 2023 - 8:46 pm

පොහොර සහනාධාර ජාතික වැඩපිළිවෙළ යටතේ ආනයනය කළ පොහොර තොග ගොවි ජනතාව වෙත ලබා නොදී, වෙනත් කර්මාන්ත ශාලාවලට වැඩි මිලකට අලෙවි කළ බව කියන සමාගම් 07කට අයත් බැංකු වාර්තා කැඳවන ලෙසට අධිකරණය නියෝග කළා.

කොළඹ ප්‍රධාන මහේස්ත්‍රාත් ප්‍රසන්න අල්විස් විසින් මෙම නියෝගය නිකුත් කර තිබෙනවා.

මෙම පොහොර අඩු මිලට ගොවීන්ට ලබාදිය යුතු වුවද, ඒවා ගොවීන්ට ලබා නොදී වෙනත් කර්මාන්තශාලා වෙත වැඩි මිල ගණන් යටතේ අලෙවි කර ඇති බවට කරුණු තහවුරු වී ඇති බවයි අපරාධ පරීක්ෂණ දෙපාර්තමේන්තු නිලධාරීන් අධිකරණය හමුවේ ප්‍රකාශ කර තිබෙන්නේ.

පොහොර ලේකම් කාර්යාලයේ ලියාපදිංචි සමාගම් 18න් 7ක් පමණ මෙම වංචාව සිදුකර ඇති බවට හඳුනාගෙන ඇති බවද එහිදී අධිකරණය වෙත දන්වා තිබෙන බව සඳහන්.