ගාල්ල ශ්‍රී හෘදය කන්‍යාරාමයේ ගණකාධිකරණ විභාග දරුවන්ට අසාධාරණයක්
Monday, 22 January 2024 - 11:14 am
ගාල්ල ශ්‍රී හෘදය කන්‍යාරාමයේ ශාලා අංක 2 විභාග මධ්‍යස්ථානයේදී උසස් පෙළ විභාගයේ පෙරේදා (20) පැවති ගණකාධිකරණ ප්‍රශ්න පත්‍රයට පිළිතුරු ලියමින් සිටි තම දරුවන්ට බලවත් අසාධාරණයක් සිදු වූ බව එම දරුවන්ගේ දෙමාපියෝ පවසති.
ඔවුන් පවසන්නේ දරුවන් ප්‍රශ්න පත්‍රයට පිළිතුරු ලියමින් සිටින විට ඔවුන් ගෙනෙන ලද ගණක (කැල්කියුලේටර්) යන්ත්‍ර විභාග ශාලාධිපතිනිය විසින් එකතු කර ගෙන ඇති බවය. පසුව විභාග ශාලාධිපතිනිය දකුණු පළාත් අධ්‍යාපන අධ්‍යක්ෂවරියකට පවසා ඇය විභාග දෙපාර්තමේන්තුවෙන් ලබා ගන්නා ලද උපදෙස් මත විනාඩි තිහකට පසුව එම ගණක යන්ත්‍ර ආපසු ලබා දී ඇති බවත් එසේ ලබා දී ඇත්තේ ඒවා කලවම් කර නිසා තම තමන්ගේ ගණක යන්ත්‍ර තෝරා ගැනීමට බොහෝ වේලාවක් ගත කරන්නට සිදුව ඇතත් ඒ සඳහා ගත වූ කාලය වෙනුවෙන් අමතර කාලයක් ලබා දී නැති බවත් දෙමාපියෝ පැවසූහ. මේ නිසා දරුවන් අඬමින් විභාග ශාලාවෙන් පිටතට පැමිණි බවද දෙමාපියෝ කීහ. මේ පිළිබඳ අධ්‍යාපන දෙපාර්තමේන්තුවේ නිලධාරියෙකුගෙන් විමසූ විට කියා සිටියේ විභාග දෙපාර්තමේන්තුව විසින් අනුමත කරන ලද ගණක යන්ත්‍ර හැර සිසුවියන් කීප දෙනෙකු වෙනත් ගණක යන්ත්‍ර ගෙනවිත් තිබූ නිසා විභාග ශාලාධිපතිනිය ඒවා ලබා ගෙන ඇති බවය. ඒ සම්බන්ධයෙන් දෙමාපියන් පැවසුවේ සිසුවියන් විභාග ශාලාවේ වාඩි වීමට පෙර එම යන්ත්‍ර පරීක්ෂා කළ යුතුව තිබූ බවය. එම නිසා මේ සම්බන්ධයෙන් තම දරුවන්ට සාධාරණයක් ඉටු කරන ලෙසද දෙමාපියෝ ඉල්ලා සිටිති. මේ පිළිබඳ විමසීමට විභාගය අවසන් වීමෙන් පසු විභාග ශාලාධිපතිනිය හමුවීමට මාධ්‍යවේදීන් ගිය විට කන්‍යා සොහොයුරියන් දෙදෙනෙක් සහ පාසලේ මුරකරු මාධ්‍යවේදීන්ට දොස් පවරා ඉවත්ව යන ලෙස පවසා දරුවන්ගෙන් ප්‍රකාශ සටහන් කර ගෙන ප්‍රධාන දොරටුව මඟහරවා වෙනත් දොරටුවකින් යවන ලදි.
.webp)
(1).webp)
(1).webp)
