Local

විදුලි බිල අඩු කරන යෝජනාව හදන්න තව සති දෙකක් ඉල්ලයි..

Wednesday, 13 November 2024 - 1:37 pm

විදුලි බිල අඩු කිරීම සම්බන්ධ නව යෝජනාවලිය ලබන සතියේ මහජන උපයෝගිතා කොමිසමට ලබාදෙන බව ලංකා විදුලි බල මණ්ඩලයේ මාධ්‍ය ප්‍රකාශක ධනුෂ්ක පරාක්‍රමසිංහ මහතා පැවසීය.

මීට පෙර විදුලි ගාස්තු අඩු කිරීම සම්බන්ධ යෝජනා මහජන උපයෝගිතා කොමිසමට ඉදිරිපත් කළ බව පැවසීය.

එහෙත් එම යෝජනාවලිය යළි සකස් කර පසුගිය 08 වැනි දා ඉදිරිපත් කරන ලෙස මහජන උපයෝගිතා කොමිසම ලංකා විදුලි බල මණ්ඩලයට දැනුම් දී තිබුණි.

එහිදී විදුලිබල මණ්ඩලය මහජන උපයෝගීතා කොමිසමෙන් ඉල්ලා සිටියේ ඒ සඳහා තවත් දින 14ක් ලබා දෙන ලෙසයි.

ඒ ගණනය කිරීම් කිහිපයක් වෙනුවෙනි.

ඒ අනුව ලබන සතියේ නව විදුලි ගාස්තු සංශෝධිත යෝජනාවලිය මහජන උපයෝගිතා කොමිසමට ඉදිරිපත් කරන බව මාධ්‍ය ප්‍රකාශකවරයා වැඩිදුරටත් පැවසීය.