ගිණුමකින් ලක්ෂ 50ක් ඇද්ද ආගරතැන්න ග්‍රාමීය බැංකුවේ මැනේජර් නෝනාට ලිපිකාරිනියට මාංචු
Saturday, 13 July 2024 - 8:09 am
සීමාසහිත පස්සර විවිධ සේවා සමුපකාර සමිතියට අයත් ආගරතැන්න ග්‍රාමීය බැංකු ශාඛාවෙන් රුපියල් ලක්ෂ 50ක මුදලක් වංචා සහගත ලෙස ලබාගත් බව කියන සිද්ධියක් සම්බන්ධයෙන් සැකපිට එහි කළමනාකාරිනිය සහ ලිපිකාරිනියක අත්අඩංගුවට ගත් බව බදුල්ල පොලිස් කොට්ඨාස විශේෂ අපරාධ විමර්ශන අංශය පවසයි. ඔවුන් මෙසේ වංචා සහගත ලෙස ලබාගෙන ඇත්තේ පස්සර ආගරතැන්න පදිංචි මවක සහ පුතකු විසින් මේ බැංකුවේ පවත්වාගෙන යන ඒකාබද්ධ ගිණුමක තැන්පත් කළ මුදල් බවද පොලිසිය පැවසීය.
තැන්පත් කළ මුදල ඇපයට තබා ණය මුදල් ගන්නා ලෙස තැන්පත්කරුවන් නමින් කූට අයදුම්පත් සකසා අවස්ථා දෙකකදී රු.ලක්ෂ 44ක මුදලක් ගෙන ඇති බවත්, අවසන් වශයෙන් ගිණුමේ ඉතිරිව තිබූ රු. 6,000ක මුදල, මුදල් ආපසු ගැනීමේ පත්‍රිකාවක් කූට ලෙස සකසා එම මුදලද ගෙන ඇති බවත් විමර්ශනවලදී අනාවරණය වූ බවද පොලිසිය සඳහන් කළේය. ගිණුම හිමි මව සහ පුතා ගම්මිරිස් වගාවෙන් ලද මුදල් ඒකාබද්ධ ගිණුමේ තැන්පත් කර තිබියදී බැංකු කළමනාකාරිය සහ ලිපිකාරිනිය මෙසේ වංචා සහගත ලෙස ගෙන ඇති බව හෙළිව තිබේ. එම මව සහ පුතා විසින් කරන ලද පැමිණිල්ලකට අනුව මෙම විමර්ශනය කළ අතර, රුපියල් ලක්ෂ 50ක මුදල වංචා සහගත ලෙස ගැනීම සඳහා සැකකාරියන් උපයෝගි කරගත් කූට ලේඛනද සොයාගත් බවත් ඒවායේ යොදා ඇත්තේ ව්‍යාජ අත්සන් බව තහවුරු වී ඇති බවත් පොලිසිය තවදුරටත් සඳහන් කරයි.
සැකකාරියෝ පස්සර මහේස්ත්‍රාත් අධිකරණයට ඉදිරිපත් කිරීමෙන් පසු මේ මස 24 දා දක්වා රක්ෂිත බන්ධනාගාරගත කරනු ලැබූහ. ඔවුන් දෙදෙනාට විරුද්ධව පොදු දේපළ පනත යටතේ නඩු පැවරීමට පොලිසිය පියවර ගෙන තිබේ. බදුල්ල දිසාව භාර නියෝජ්‍ය පොලිස්පති සුජිත් වෙදමුල්ල සහ බදුල්ල කොට්ඨාසය භාර ජ්‍යෙෂ්ඨ පොලිස් අධිකාරි වසන්ත කන්දෙවත්ත මහත්වරුන්ගේ උපදෙස් මත බදුල්ල කොට්ඨාසය විශේෂ අපරාධ විමර්ශන අංශයේ ස්ථානාධිපති පොලිස් පරීක්ෂක ජයවර්ධන මහතාගේ මෙහෙයවීම යටතේ පොලිස් සැරයන් (271483) ඉන්දික මහතා විසින් මේ විමර්ශනය සිදු කර තිබේ.
.webp)
