නවගමුව තුන්අඳහේන ප්‍රදේශයේ ඊයේ(10)රාත්‍රියේ සිදු වූ වෙඩි තැබීමකින් තුවාල ලැබූ අයෙක් ජීවිතක්ෂයට පත්ව ඇත.
කඩුවෙල කොරතොට ප්‍රදේශයේ නිවසකට පොලිස් විශේෂ කාර්ය බළකායේ නිලධාරීන් ලෙස පවසමින් සම්පූර්ණයෙන් මුහුණු ආවරණය කෙරෙන යතුරුපැදි හිස් ආවරණ පැලඳ යතුරු පැදියකින් පැමිණි දෙදෙනෙකු විසින් එම නිවසේ සිටි පුද්ගලයකු පැහැර ගෙන ගොස් ඊයේ රාත්‍රි හිසට වෙඩි තබා ඇතැයි පොලීසිය පැවසීය.
මෙම පුද්ගලයාව නිවසින් රැගෙන යන විට නිවසියන්ට ඇති වූ සැකය හේතුවෙන් නිවැසියන් යතුරු පැදිය පිටුපස ලුහුබැද ගොස් ඇත.
එහි දී පැහැරගෙන ගොස් තිබූ පුද්ගලයා කොරතොට, වැලිහිංතුඩුව, මහවෙල බෝක්කුව ආසන්නයේ හිසෙහි බරපතල තුවාල සහිතව වැටී සිටියදී සොයාගෙන නිවැසියන් විසින් ඔහුව අතුරුගිරිය රෝහලට ඇතුලත් කර තිබේ.
පසු වැඩිදුර ප්‍රතිකාර සඳහා කොළඹ ජාතික රෝහලට ඇතුළත් කිරීමෙන් පසු ඔහු මියගොස් ඇතැයි පොලීසිය සඳහන් කළේය.
මෙලෙස වෙඩි ප්‍රහාරයට ලක්ව මියගොස් ඇත්තේ, කඩුවෙල කොරතොට ප්‍රදේශයේ පදිංචිකරුවකු වන බුද්ධික ප්‍රසාද් නමැති එක්දරු පියෙකි.
මෙම ඝාතවයට හේතුව මෙතෙක් අනාවරණය වී නොමැති අතර සැකකරුවන් අත්අඩංගුවවට ගැනීම සදහා
නවගමුව පොලිසිය විමර්ශන ආරම්භ කර ඇත.
