කොතරම් අභියෝග තිබුණත් අනාගතය වෙනුවෙන් කරන ආයෝජන නතර කරන්නේ නෑ
Monday, 22 January 2024 - 9:12 am
කෙතරම් ආර්ථික අපහසුතා සහ අභියෝග පැමිණියත් රටේ අනාගත දරු පරපුර වෙනුවෙන් සිදු කරන ආයෝජන කිසිදු අවස්ථාවක නතර නොකරන බව ලංකාවේ සීමාසහිත එක්සත් ප්‍රවෘත්ති පත්‍ර සමාගමේ සභාපති, මහාචාර්ය හරේන්ද්‍ර කාරියවසම් මහතා ප්‍රකාශ කරයි.
සභාපතිවරයා මේ බව පැවැසුවේ වාර්ෂිකව පවත්වන ලේක්හවුස් ආයතනයේ සේවක දූ දරුවන්ට පාසල් පොත් බෙදා දීමේ උත්සවය පසුගිය 19 වැනිදා ලේක්හවුස් ආයතන පරිශ්‍රයේදී පැවති අවස්ථාවේදීය.
එහිදී වැඩිදුරටත් අදහස් පළ කළ සභාපතිවරයා මෙලෙස ද කීවේය.
“මා පළමුවෙන්ම මේ මොහොතේ මතක් කරනවා, මේ වැඩසටහන පටන් ගත් අපේ හිටපු සභාපතිවරයෙක් වන නලින් ලද්දුවාහෙට්ටි මහතා. මම හිතන්නේ 2003දී මේ වැඩසටහන පටන් ගත්තේ. එතැන් පටන් මේ වැඩසටහන අද වනතෙක් කොයිතරම් ආර්ථික අපහසුතා පැමිණියත්, ගැටලු ඇති වුණත් මේ කාර්යය අපි දිගටම කරගෙන ආවා.
ආදරණීය දූ පුතුනි, අද මේ සුදු වතින් සැරසිලා ඉන්න ඔය ගොල්ලෝ තමයි මේ රටේ අනාගතය. ඔය ගොල්ලො වරද්ද වරද්ද තියෙන පුංචි පා පොඩිවලින් තමයි මේ රටේ අනාගතය හැදෙන්නේ. ඒ නිසා අපේ කලින් නියෝජ්‍ය සාමාන්‍යාධිකාරී චන්දන බණ්ඩාර මහතා පැවසූ විදිහට අතිවිශාල මුදලක් මේ සඳහා වෙන් කර තියෙනවා. අප අධ්‍යක්ෂ මණ්ඩලය මේ කර්තව්‍ය දකින්නෙත් මේ රටේ සහ මේ ලෝකේ අනාගතය වෙනුවෙන් අප කරන ආයෝජනයක් හැටියටයි. ඒ නිසා අද පොඩියට සුදු වතින් සැරසිලා ඉන්න ඔයගොල්ලෝ මේ පාසල් පොත් අරගෙන ඉගෙනගෙන මේ රටේ, මේ ලෝකයේ විද්වතුන් හැටියට සැරිසරන දවසට අප කැප කළ මේ කාලය සහ ධනයට සැබෑ අර්ථයක් ලැබෙනවා.
ආදරණීය දූ පුතුනි, ඔයාලගේ අම්මා, තාත්තා වැඩ කරන්නේ ලංකාවේ තියෙන හොඳම පත්තර කන්තෝරුවේ. ඒ තමයි පත්තර මහගෙදර. ඔයගොල්ලන්ට, ඔයාලගේ අම්මට, තාත්තට, ඔයාට ආඩම්බරයෙන් කියන්න පුළුවන් අපි ලේක්හවුස් පවුලේ සාමාජිකයෝ කියලා. ඒ නිසා අපි දෙන මේ පුංචි තෑග්ග අරගෙන ඔයගොල්ලෝ ඉගෙන ගත්තොත් ඒක අපේ රටට සහ ලෝකෙට විශාල ශක්තියක්.
ආදරණීය දූ පුතුනි, අපේ දැනුම, කුසලතාව, ආකල්ප වර්ධනය කර ගන්න ඕනේ. දැනුම පත පොතෙන්, පත්තරෙන් ඔයගොල්ලන්ට ගන්න පුළුවන්. හැබැයි අනාගත ලෝකයට වැඩියෙන්ම ඕනේ කුසලතා (skills). ඔයාගේ computer knowledge, IT, English, communication මේ වගේ කතා කරන ඒවා දුවේ පුතේ අපි පුහුණු වෙන්න ඕනේ. අම්මට තාත්තාට ඒවා ඔයාට දෙන්න බෑ. දැනුම ඔයාට පොතකින් ඉගෙන ගන්න පුළුවන්. හැබැයි අනාගත ලෝකයේ ඉඩ තියෙන්නෙ කුසලතා වර්ධනය කර ගත් අයට.
ඒ නිසා අද පොඩියට ඉන්න ඔයගොල්ලෝ අද අපි දෙන පුංචි තෑග්ගෙන් කුසලතා වර්ධනය කරගන්න උත්සාහ ගත්තොත් IT, Digital, කතා කිරීමේ
කිරිබත්ගොඩ විහාරමහා දේවි බාලිකා විද්‍යාලයේ ඉගෙනුම ලබන මිතාරා පියුනි දියණිය ස්තූති කථාව පවත්වමින්.කිරිබත්ගොඩ
විහාරමහා දේවි බාලිකා විද්‍යාලයේ ඉගෙනුම ලබන මිතාරා පියුනි දියණිය ස්තූති කථාව පවත්වමින්.
පැත්ත දියුණු කරගත්තොත් ඒක තමයි අනාගත ලෝකයට අවශ්‍ය. ඉතින් මං හිතනවා, අපේ ලේක්හවුස් පවුලේ ආදරණීය හොඳ සාමාජිකයන්ගේ දූ පුතුන් ඔයගොල්ලෝ. ඒක හරියට තේරුම් අරගෙන අප කැප කළ කාලයට, ධනයට සැබෑ අර්ථයක් එක් කර අනාගතයට ලොකු සේවයක් කරයි කියලා අපි විශ්වාස කරනවා.
ඒ වගේම චන්දන බණ්ඩාර මහතා ඇතුළු මේ කර්තව්‍ය සංවිධානය කිරීමට විශේෂයෙන් කැපවූ ආයතනික කටයුතු අංශයට විශේෂ ස්තූතියක් අධ්‍යක්ෂ මණ්ඩලය වෙනුවෙන් පිරිනමනවා. අපි මෙවැනි වැඩසටහන් තව තවත් ඉදිරියේදී කරගෙන යනවා. මේවා තව තවත් පුළුල් කරනවා. ඒ මොකද අධ්‍යාපනයට කැප කිරීම් කරන්න ආයතනයේ පාලන අධිකාරිය හැටියට අපි කිසිම පැකිළීමක් දක්වන්නේ නෑ. ඒ වගේම අපේ සියලු පුවත්පත්වල අධ්‍යාපනය, දැනුම වර්ධනය කරන කොටස් ඇති කරන්නත් අපි හැකිතාක් උත්සාහ කරනවා. එයින් මේ පුංචි දූ පුතුන් අනාගතයේ මල් වගේ පිපිලා මේ ලෝකය සුවඳවත් කරයි. ඒ සුවඳ මේ ලෝකයේ විහිදෙන දවසට අපි ඈතක ඉඳන් ඔයගොල්ලෝ දිහා බලාගෙන ඉන්නවා. කවදා හරි මේ ආයතනයෙන් සමුගත්තත් ඔයගොල්ලෝ මේ රටට සේවය කරන හැටි බලලා අපට සතුටු වෙන්න පුළුවන් නම් ඒ තමයි සැබෑ සතුට.”
නියෝජ්‍ය සාමාන්‍යාධිකාරී (ආයතනික කටයුතු) චන්දන බණ්ඩාර මහතා:
“පූර්වගාමී සභාපති නීතිඥ නලින් ලද්දුවාහෙට්ටි මහතා ආරම්භ කළ මේ වැඩසටහන 2003 සිට මේ දක්වා නොනවත්වා පවත්වාගෙන පැමිණි වැඩසටහනක් ද වෙනවා. වෙනත් වසරවල වගේම මේ වසරේත් මේ වැඩසටහනට අතිවිශාල මුදලක් ආයතනය වෙන් කර තියෙනවා. ඒ අනුව මේ වර්ෂයේදී රුපියල් මිලියන 5.5කට ආසන්න මුදලක් වැය වෙලා තියෙනවා.
අද මේ වැඩසටහනේදී විශේෂයෙන්ම පාසල් උපකරණ දුන්නා වගේම පාසල් බෑග් සහ පාසල් සපත්තු මිලදී ගැනීමට වවුචර් පතක් දීමට ද මේ අවස්ථාවේ කටයුතු කළා. මේ සඳහා සුබසාධන අංශය මූලික වෙලා තමයි කටයුතු කරගෙන යන්නේ. අද වෙනකොට රටේ පවතින ආර්ථික තත්ත්වය හමුවේ වුණත් අපි මේ කරගෙන ආ කාර්යය ඉදිරියටත් නොනවත්වා පවත්වාගෙන යනවා. මේ වසරෙත් මේ කාර්යය සිදු කිරීම සම්බන්ධයෙන් සභාපතිතුමා සහ අධ්‍යක්ෂ මණ්ඩලයට, සේවකයන් වෙනුවෙන් ස්තූතිවන්ත වෙනවා.”
මේ අවස්ථාවට සහභාගි වූ ෂාශි‍යා පාතිමා දියණිය ගීතයකින් උත්සව සභාව පින වූ අතර, ස්තූති කතාව විකුණුම් දෙපාර්තමේන්තුවේ එච්. කේ. ශ්‍රියානි මහත්මියගේ දියණිය වන කිරිබත්ගොඩ විහාර මහදේවි බාලිකා විද්‍යාලයේ 11 වන ශ්‍රේණියේ ඉගෙනුම ලබන මිතාරා පියුනි විසින් සිදු කරන ලදි.
ලංකාවේ සීමාසහිත එක්සත් ප්‍රවෘත්ති පත්‍ර සමාගමේ මූල්‍ය අධ්‍යක්ෂ, ආචාර්ය සුනිල් ජයන්ත නවරත්න, නීති හා පරිපාලන අධ්‍යක්ෂ, නීතිඥ ජනක රණතුංග, කර්තෘ මණ්ඩල අධ්‍යක්ෂ සිසිර පරණතන්ත්‍රි, සාමාන්‍යාධිකාරී සුමිත් කොතලාවල, අතිරේක සාමාන්‍යාධිකාරී වී. එස්. බොයිස්, සමාගම් ලේකම් සුදර්ශී හේවාවසම්, නියෝජ්‍ය සාමාන්‍යාධිකාරී (දැන්වීම්) චින්තක යාපා මහත්වරුන් ඇතුළු සුබසාධන අංශයේ නිලධාරීහු ද මේ අවස්ථාවට සහභාගි වූහ.
