චීනයෙන් රු. බිලියන අටක සන්නිවේදන සහ ත්‍රස්ත මර්දන උපකරණ ප්‍රදානයක්
Thursday, 01 August 2024 - 9:11 am
චීනය මෙරට ආරක්ෂක හමුදා වෙත රුපියල් බිලියන අටක් වටිනා සන්නිවේදන සහ ත්‍රස්ත මර්දන උපකරණ ලබා දී තිබෙන බව මෙරට චීන තානාපති කී. සෙන්හොංග් මහතා පවසයි.
චීන තානාපති කී. සෙන්හොංග් මහතා මේ කරුණු ප්‍රකාශ කළේ චීන මහජන විමුක්ති හමුදාව පිහිටුවීමේ 97 වැනි සංවත්සරය සැමරීම සඳහා මහජන චීන සමූහාණ්ඩුවේ ශ්‍රී ලංකා තානාපති කාර්යාලය විසින් පෙරේදා කොළඹ ෂැංග්‍රිලා හෝටලයේදී පැවති සැමරුම් උත්සවයක් අමතමිනි.
මහජන චීන සමූහාණ්ඩුවේ ශ්‍රී ලංකා තානාපති, කී. සෙන්හොංග් මහතා සහ එම තානාපති කාර්යාලයේ ආරක්ෂක උපදේශක ජ්‍යෙෂ්ඨ කර්නල් සෝ බෝ විසින් සිදු කරනු ලැබූ ආරාධනයෙන් ආරක්ෂක ලේකම් ජෙනරල් කමල් ගුණරත්න මහතා මෙම උත්සවයේ ප්‍රධාන ආරාධිතයෝ ලෙස සහභාගි වූහ.
මෙහිදී උත්සව සභාව ඇමතූ ජෙනරල් ගුණරත්න, ශ්‍රී ලංකාව සහ චීනය අතර පවතින දිගුකාලීන ශක්තිමත් ආරක්ෂක සබඳතාවය සහ වසර ගණනාවක් පුරා චීන රජය විසින් මෙරටට ලබා දුන් සහයෝගය වෙනුවෙන් අතිගරු තානාපතිතුමා සහ චීන රජය වෙත සිය කෘතඥතාව පළ කරන බවය. තවද මෙම උත්කර්ෂවත් සැමරුම් අවස්ථාවට සහ චීන මහජන විමුක්ති හමුදාවේ සාමාජිකයින් වෙත සිය උණුසුම් සුබ පැතුම් ද එක් කරන ලදී.
චීනය සහ ශ්‍රී ලංකාව අනාධිමත් කලක පටන් සාම්ප්‍රදායික මිත්‍ර අසල්වැසියන් වන අතර දෙරට අතර රාජ්‍යතාන්ත්‍රික සබඳතා පිහිටුවීමේ 67 වැනි සංවත්සරය මේ වසරේ සනිටුහන් වන බවත් දෙපාර්ශ්වයේම ඒකාබද්ධ ප්‍රයත්නයන් ඔස්සේ තවදුරටත් ද්විපාර්ශ්වික හමුදා සබඳතා ඉහළ මට්ටමකට ප්‍රවර්ධනය කිරීමට හැකි වනු ඇති බවත් චීන තානාපති කී. සෙන්හොංග් මහතා ප්‍රකාශ කළේය.
එහිදී චීන තානාපතිවරයා මෙසේද පැවසීය
අද වන විට චීන හමුදාව කලාපීය සහ ගෝලීය සාමය සහ ආරක්ෂාව පවත්වාගෙන යෑමේ වැදගත් බලවේගයක් බවට පත්ව තිබෙනවා. ශ්‍රී ලංකාව සාම්ප්‍රදායික හා සාම්ප්‍රදායික නොවන තර්ජනවලට මුහුණ දී සිටින බැවින්, චීන ජනතාව සහ හමුදාව ශ්‍රී ලංකාවේ ජනතාව සහ හමුදාව සමග ස්ථිරව එකට ඉන්නවා. චීනය ශ්‍රී ලංකාවේ ජාතික ස්වෛරීභාවය සහ භෞමික අඛණ්ඩතාව ආරක්ෂා කිරීම සඳහා සැමවිටම පෙනී සිටිනවා පසුගිය වසර දෙක තුළ, අපගේ සන්නද්ධ හමුදා දෙක අතර ඉහළ මට්ටමේ සංචාර, උපකරණ සහයෝගීතාව, පිරිස් පුහුණුව සහ සමුද්‍රීය ආරක්ෂාව වැනි ක්ෂේත්‍රවල හුවමාරු සහ සහයෝගීතාව තවත් තහවුරු වෙලා තියනවා. රුපියල් බිලියන 8 කට වැඩි වටිනාකමකින් යුත් විවිධ වර්ගයේ සන්නිවේදන සහ ත්‍රස්ත මර්දන උපකරණ ශ්‍රී ලංකාව වෙත චීන හමුදාව විසින් ලබා දී තියනවා. සෑම වසරකම සියලුම තරාතිරම්වල නිලධාරීන්ට සහ විවිධ වර්ගයේ භට පිරිස් සඳහා චීන හමුදාව මගින් පුහුණුවක් ලබා දෙනවා. ශ්‍රී ලංකා සන්නද්ධ හමුදාවන්ට සිය ආරක්ෂක හැකියාවන් ඉහළ නැංවීම සඳහා ඉදිරියටත් අඛණ්ඩව සහාය ලබා දෙන බව කියන්න අවශ්‍යයි.
චතුර පමුණුව
