කීර්තිමත් කේම්බ්‍රිජ් විශ්ව විද්‍යාලයීය ශිෂ්‍ය සංගමය ඇමතීම විදේශ කටයුතු ඇමැති අලි සබ්රි මහතා විසින් ඊයේ(23) සිදු කළේය.
කේම්බ්‍රිජ් යුනියන්හිදී සම්භාවනීය ප්‍රේක්ෂකාගාරයේ දී මෙලෙස දේශනයක් පැවැත්වීමට ආරාධනා කිරීම පිළිබඳව ඇමතිවරයා කෘතඥතාව පළ කර සිටියේය.
නීතිඥයෙකු සහ නීති සම්පාදකයෙකු ලෙස සිය දැනුම බෙදා ගැනීමට කේම්බ්‍රිජ් විශ්ව විද්‍යාලයීය ශිෂ්‍ය සංගමය ආරාධනා කිරීම ගෞරවයක් බවද අමාත්‍යවරයා පැවසීය.
ශ්රී ලංකාවෙන්, සමුද්‍රීය වෙළෙඳ මාර්ග සහ මුහුදු මංසන්ධියේ උපායමාර්ගික පිහිටීම හේතුවෙන්, ඓතිහාසිකව ගෝලීය සුපිරි බලවතුන්ගේ උනන්දුව ආකර්ෂණය ශ්රී ලංකාය ලැබී ඇත. 1948 වසරේ දී නිදහස ලබා ගැනීමට පෙර ශ්රී ලංකාව වසර 500 ක් පමණ යටත් විජිත පාලනය යටතේ පැවතුනි. යටත් විජිත යුගයේ සූරාකෑමේ සහ බෙදීමේ උරුමය අපේ ජාතිය මත නොමැකෙන සලකුණක් තැබුවද, ප්‍රජාතන්ත්‍රවාදය, නීතියේ ආධිපත්‍යය, ශක්තිමත් ස්වාධීන අධිකරණයක්, ශක්තිමත් සිවිල් සේවයක් සහ අත්‍යවශ්‍ය යටිතල පහසුකම් හඳුන්වාදීම වැනි ධනාත්මක දායකත්වයන් අපට නොසලකා හැරිය නොහැකි බව සබ්රි අමාත්‍යවරයා සිය දේශනයේ දී කියා සිටියේය.
ප්‍රජාතන්ත්‍රවාදය යනු නිසැකව ම පාලන ක්‍රමයේ වඩාත්ම යෝග්‍ය ආකාරය වන නමුත්, සිය මතය අනුව, එයට ජයගත යුතු ප්‍රධාන නෛසර්ගික අභියෝග තුනක් ඇතැයි අමාත්‍යවරයා පෙන්වා දුන්නේය. පළමුව, දේශපාලන මැතිවරණ වාසි සදහා සමාජ වෙනස්කම් භාවිත කිරීමෙන් වැළකී සිටීම, දෙවනුව, ක්‍රියාත්මක කිරීමට නොහැකි ජනප්‍රිය ආර්ථික ප්‍රතිපත්ති මැතිවරණ පොරොන්දු ලෙස ලබා නොදිය යුතුය. අවසාන වශයෙන්, රජය සහ දේශපාලන පක්ෂ තුළ මූලික ප්‍රතිපත්ති නිසි ලෙස නොවෙනස් ආකාරයෙන් පවත්වාගෙන යාමේ අභියෝගයයි.
ප‍්‍රජාතන්ත‍්‍රවාදී රටවල් ගෝලීය වශයෙන් අත්කර ගෙන ඇති සාපේක්ෂ ආර්ථික හා සමාජ ප්රගතිය සැලකීමේ දී එම රටවල සිටින නායකයින් මෙම අභියෝග තුනට කෙතරම් හොඳින් මුහුණ දුන්නේද යන්න සෘජුවම ආරෝපණය කළ හැකිය.
ඇමැති අලි සබ්රි මහතා පෙන්වා දුන්නේ පසුගිය වසර 75 දෙස ආපසු හැරී බලන විට, ස්වාධීන රාජ්‍යයක් ලෙස, ශ්රී ලංකාව සිය ජනතාවගේ සමාජ උන්නතිය සහතික කිරීම සඳහා කැපවීමෙන් කටයුතු කර ඇති බවයි. සාක්ෂරතාවය, පෝෂණය, අධ්‍යාපනය සහ සමාජ සුබසාධනය යන අභියෝගවලට මුහුණ දෙමින් එම ක්ෂේත්‍රවල සැලකිය යුතු ප්‍රගතියක් ශ්රී ලංකාව අත්කර ගෙන ඇත. ශ්රී ලංකාව එහි සියලුම පුරවැසියන්ට නිදහස් සෞඛ්‍ය සේවාව සහ නොමිලේ අධ්‍යාපනය ලබා දෙයි.
ශ්රී ලංකාව තුළ ජවසම්පන්න සහ ස්වාධීන අධිකරණයක් ඇත. නමුත් එහි කාර්යක්ෂමතාව ගැන බොහෝ දේ පැවසිය නොහැකිය. පුරවැසියෙකු සහ නීතීඥයෙකු වශයෙන්, යුක්තිය පසිඳලීමේ කාර්යක්‍ෂම සහ සාධාරණත්වය පිළිබඳව තමන්ට විවිධ අවස්ථාවන්හිදී ගැටලු පවතින බව ඔහු පැවසීය.
නීති පද්ධතිය යාවත්කාලීන නොවීම, පැරණි නීති නූතන සමාජයට ඔබින පරිදි සමාලෝචනය නොකිරීම සහ නව තාක්ෂණය වැලඳ ගැනීමට ඇති අකමැත්ත එහි මූලික හේතු බවද අලි සබ්රි මහතා පෙන්වා දුන්නේය.
නිදසුනක් වශයෙන්, 2019 වන විට, ශ්රී ලංකාවේ සියලුම අධිකරණවල විනිසුරුවරුන් 336 දෙනෙකු විසින් විභාග කිරීමට ආසන්න වශයෙන් නඩු මිලියන 1 ක් තිබුණි. “ප්‍රමාද වූ යුක්තිය, යුක්තිය ප්‍රතික්ෂේප කිරීම“ යැයි කියමනක් තිබේ. නීතියේ ප්‍රමාදයන් නීතියේ ආධිපත්‍යය, සමාජ ඒකාබද්ධතාවය, ආයෝජනය සහ ජාතියක ආර්ථික ප්රගතිය කෙරෙහි සෘජු ඍණාත්මක බලපෑමක් ඇති කරන බවද හෙතෙම අවධාරණය කළේය.
ආර්ථික ප්‍රතිසාධනය උදෙසා ශ්රී ලංකාව ගමන් ගන්නා මාර්ගය සම්බන්ධයෙන් ඇමතිවරයා විශේෂයෙන්ම මෙහිදී කරුණු පැහැදිලි කරමින් කියා සිටියේ, “මගේ රට, හරි හෝ වැරදි; හරි නම්, නිවැරදිව තබා ගැනීමට; වැරදි නම් නිවැරදි කළ යුතුයි.” යන්නයි.
ඇමතිවරයා කියා සිටියේ ඇතැම්විට මෙම කියමන ආන්දෝලනාත්මක යැයි සිතුවද, එහි අභ්‍යන්තර අර්ථය – ජාතිය ගොඩනැගීමේ පුරවැසියෙකුගේ වගකීම අවධාරණය කිරීම බවත් එය සැමවිටම තමාට ආශ්වාදයක් ලබා දී ඇති බවත්ය.
