ජනාධිපති අවබෝධයෙන් බොරු කියලා තියෙනවා.. ඒවායින් අපට හානි වුනා..
Tuesday, 22 October 2024 - 7:28 pm
ජනාධිපති අනුර දිසානායක මහතා අවබෝධයකින් යුතුව බොරු කියූ අවස්ථා ඇතැයි ශ්රී ලංකා පොදුජන පෙරමුණේ හිටපු පාර්ලිමේන්තු මන්ත්‍රී නාමල් රාජපක්ෂ මහතා සඳහන් කරයි.
නමුත් එසේ අවබෝධයකින් කියන ලද බොරුවලින් තම පාර්ශවයට විශාල පහරක් වැදුණු බවත් හානියක් වූ බවත් ඔහු පැවසීය.
හෙතෙම මේ බව කියා සිටියේ වැලිකන්ද ප්‍රදේශයේ පැවති ජන හමුවක් අමතමිනි.
”අපි විශ්වාස කරනවා අනුර කුමාර දිසානායක මහතා දේශපාලන වේදිකාවල ජනතාවට ලබාදුන් පොරොන්දු ඒ අයුරුම ඉටුකරයි කියලා. යම් අවස්ථාවල එතුමා ඒ පොරොන්දුවලින් බැහැරව ගිහිල්ලා තියෙනවා.
මුත් අපි තවම බලාගෙන ඉන්නවා ඔහු මේ රටේ ආර්ථික සහ සමාජයීය වැඩපිළිවෙළ ඉදිරියට ගෙන යන්නේ කොහොමද කියලා. එතුමා වේදිකාවල කියපු පොරොන්දු අහලා බහුතරයක් ඔහුට ඡන්දය දුන්නා. එතුමාට පළපුරුද්ද අඩුයි. ඒ නිසා වේදිකාවල යම් යම් ප්‍රකාශ කරලා තියෙනවා.
අනුර කුමාර දිසානායක මහතා අවබෝධයකින් බොරු කියපු අවස්ථාත් තියෙනවා. ඒවායින් අපට ලොකු පහරක් වැදුනා හානියක් වුණා. හැබැයි ඉතින් අවබෝධයකින් තමයි බොරු කියල තියෙන්නෙ.
අපි බලමු ඒ මහතා ඉදිරියේදී කුමක් කරයිද කියලා”
