Local

වෙලදපලේ සහල් හිගය කෘතිම එකක්..- රජය

Saturday, 19 October 2024 - 10:07 am

වෙළෙඳපොළේ නාඩු සහල් මිල පාලන මිල ඉක්මවා ඉහළ ගොස් ඇතිබව මරදගහමුල සහල් නිෂ්පාදකයින්ගේ සංගමයේ සභාපති බී.කේ.රංජිත් මහතා පැවසීය. නාඩු වී හිඟය ඊට හේතුවී තිබේ.

මේ වනවිට නාඩු සහල් කිලෝ ග්‍රෑමයක් රුපියල් 230 ඉක්මවා සිල්ලර වෙළෙඳපොළේ අලෙවි වන බව පැවසීය.

නාඩු සහල් අලෙවි කළ යුතු උපරිම සිල්ලර මිල රුපියල් 220ක් බව පැවසීය.

මේ පිළිබඳව අංශ කිහිපයකින් සොයා බලන බව වෙළෙඳ අමාත්‍යාංශයේ ලේකම් එම්.එම්.නයිමුදීන් මහතා පැවසීය.

පසුගිය කන්නයේ හා මෙවර කන්නයේ නාඩු වී අස්වැන්න ප්‍රශස්ත මට්ටමක පැවති බව කෘෂිකර්ම අමාත්‍යාංශයේ නිලධාරීන් සමග කළ සාකච්ඡාවේදී අනාවරණය වූ බව ලේකම්වරයා පැවසීය.

ඒ අනුව වෙළෙඳපොළේ ඇත්තේ කෘතීම සහල් හිඟයකි.

පවතින තත්ත්වය පිළිබඳ මහා පරිමාණ සහල් මෝල් හිමියන් සමග සාකච්ඡා කර විසඳුමකට එළඹෙන බව ලේකම්වරයා පැවසීය.

ඊට සමගාමීව සතොස හරහා නාඩු වී සෘජුව මිලට ගෙන සහල් බවට පත් කර වෙළෙඳපොළට නිකුත් කිරීමට පියවර ගන්නා බවද ලේකම්වරයා වැඩිදුරටත් පැවසීය.