සමාජ මාධ්‍යවල ප්‍රචාරණ කටයුතු සිදු කිරීමත් තහනම්
Wednesday, 13 November 2024 - 12:58 pm
පාර්ලිමේන්තු මැතිවරණයට අදාළ සියලු ප්‍රචාරණ කටයුතු අවසන් වී ඇති බැවින් සමාජ මාධ්‍යවල සිදුකරනු ලබන සියලු ප්‍රචාරණ කටයුතු අත්හිටුවන ලෙස මැතිවරණ කොමිෂන් සභාව දැනුම්දෙනවා.
ඒ අනුව දේශපාලන පක්ෂ, අපේක්ෂකයින්, පක්ෂ සහ අපේක්ෂකයින්ගේ අනුගාමිකයින් සහ සමාජ මාධ්‍ය භාවිත කරන්නන් සමාජ මාධ්‍යවල ප්‍රචාරණ කටයුතු සිදු කිරීමෙන් වළකින ලෙසයි එම කොමිසම දැනුම්දෙන්නේ.
යම් ආකාරයකින් එවැනි ප්‍රචාරණ කටයුත්තක් සමාජ මාධ්‍ය භාවිත කරමින් සිදු කරන බවට වාර්තා වන්නේ නම්, එම ප්‍රචාරණවල අන්තර්ගත කරුණු ඉවත් කිරීම සඳහා අදාළ සමාජ මාධ්‍ය ආයතනවලට යොමු කරන බව ද නිවේදනයක් නිකුත් කරමින් මැතිවරණ කොමිෂන් සභාව සඳහන් කරනවා.
මේ අතර පසුගිය ඔක්තෝබර් මස 11 වනදා මධ්‍යාහ්න 12.00 සිට නොවැම්බර් 11 වනදා මධ්‍යම රාත්‍රී 12.00 දක්වා කාලය තුළ සමාජ මාධ්‍ය සම්බන්ධයෙන් වන පැමිණිලි 490ක් මැතිවරණ කොමිසම වෙත ලැබී තිබෙනවා.
